Scolas, cumunu, biblioteca e bar serraus po dexi dis, ma de oi in Burcei torrat  a oberri totu. Is impestamentus funt calaus de prus de sa metadi e su sindigu de sa bidda, Simoni Monni, at decidiu de non allonghiai sa serrada. In Burcei funt cuatru is mortus de Covid de candu su virus est intrau in sa vida de totu su mundu.

“Besseus a foras de dexi dis dificilis po totus e bosi possu assegurai ca s’aministratzioni at sunfriu meda po erribai a serrai totu. Ma non si podiat fairi in atra manera po cicai de binciri custa pesta mala. Seus partius de tenni, po is numurus uficialis, feti otu impestaus, ma sa genti de Burcei at tentu grandu responsabilidadi fendunosì connosciri de essiri impestaus. Seus erribaus a ndi tenni aici sessanta e po custu su 14 de gennargiu passau eus decidiu de serrai totu cussu chi podiaus”, narat su sindigu. “Eus fatu una cica e seus erribaus a nd’agatai atrus puru, ma imoi funt prus de sa metadi cussus sanaus, ma is atrus puru funt postus beni”, sighit a nai.

Acabat aici su sindigu Monni: “Podeus nai ca is regulas chi eus donau a is citadinus funt serbias!”.

Po una nova bella chi allirgat su coru un’atra mala chi intristat a totus, eriseru su bulletinu regionali chistionat de su numuru prus mannu de mortus in d’una dì: dexi. Mortus un’omini de sessantacuatr’annus chi biviat in sa provincia de su Sud Sardigna, tres ominis de cincuantadus, settantacuatru e otantaseti e una femina de norantadus annus chi biviant totus in sa Citadi Metropolitana de Casteddu, tres ominis de setantases, otantotu e norantunu de sa provincia de Tatari e dus ominis de setantanoi e norantun’annus de sa provincia de Nugoro.

Finas is impestamentus funt bessius de numuru, 1.224, massimamenti poita si funt fatus prus tamponis, difatis sa percentuali est calada de su 7,8% a su 6,1%. Abarrat oguali su numuru de is ricoveraus in terapia intensiva e crescint de cuatru cussus in is atrus aposentus, imoi funt 291.

Incungiaus in domu a eriseru funt 22.775.

 

 

25 de gennargiu de su 2022

 

 

 

Màuru Mura

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

Foto: https://it.wikipedia.org/wiki/Burcei