Totò Schillaci, giogadori de fubalu famau in totu su mundu, chi at giogau massimamenti po su Messina, sa Juventus e s’Inter e chi in su 1990 est stetiu su giogadori chi iat fatu prus gol in su Campionau de su mundu giogau in Italia, eris a mengianu est stetiu unu de is testimongius candu su Ros de Palermu at acapiau su capu mafiosu Mateu Messina Denaro.
“M’agataia in sa clinica, fui aspetendu de intrai, prus o mancu furint is otu e unu cuartu, a pustis apu bidu lompiri totu is carabineris cun sa faci atacada po non si fairi connosciri e nos ant frimau a totus”, contat Schillaci a is giornalistas.
Candu est cumentzada s’atzioni de is Carabineris de su Ros, Schillaci s’agataiat in su spidali ca depiat fairi bisitas po sei: “Fui in is orus de su bar e non soi nemancu lompiu a intrai poita fui pipendumì una sigareta candu ddus apu bistus erribai e nos ant frimau. Nos ant nau de abarrai frimus aunia nos agatiaus. Pariat unu film”.
Ma atrus testimongius puru, non famaus che Schillaci, ant chistionau. “Dogna lunis cust’omini chi ant acapiau faiat sa chemioterapia cun mei. Abarriaus finas in su matessi aposentu, cun mei est sempiri stetiu gentili meda”, aici una femina, at contau a Tv2000 de airi cumpartziu cun Mateu Messina Denaro is curas po su cancru, in su spidali privau, aunia ddu ant agatau e acapiau. “Calencua de is amigas mias tenint su numuru de su telefunu cosa sua. Issu mandaiat messagius a totus. Finas a custu mengianu at scambiau messagius cun d’una amiga mia chi immoi s’agatat in domu sua. Est abarrada spantada e ancora non cumprendit”.
“Beniat tzerriau Andria”, sighit sa femina. “Apu fatu sa chemio cun d’unu boss famau in totu su mundu, de non creiri! Deu ddue soi andada de su mesi de maju a-i cussu de Sant’Andria, po totu s’istadi fustis paris e erribaiat cun sa camisa a manigas longas finas candu ci fut calori meda”.
Màuru Mura
Martis, su 17 de gennargiu de su 2023
Foto: https://www.oglioponews.it/2023/01/16/le-immagini-della-clinica-dove-e-stato-arrestato-messina-denaro/
