“Piticu su schifu. E canta tristura”, at cumentau su leader de Atzione Carrulu Calenda. “Ta schifu”, at aciuntu Teresa Bellanova de Italia Viva, “fueddus sessistas aunia ancora una borta sa femina no estamostada cun dignidadi prena, ma una cosa de umperai de is ominis, unu premiu po chini balit”.
Criticas e fueddus grais po Sirviu Berlusconi po cussu chi at nau s’atra dì chistionendu cun is giogadoris de fubalu de su Monza intru e mesu de sa gena po Paschigedda de sa scuadra.
“Eus agatau un allenadori nou chi fut s’allenadori de sa scuadra de is giovanus: est bravu, geniosu, gentili e capassu de donai afroddiu a is piciocus nostus. Deu ddue apu postu calencuna cosa in prus, poita a is piciocus chi funt lompius innoi immoi apu nau: ‘Immoi erribant sa Juventus, su Milan e is atras scuadras mannas, chi binceis cun d’una de custas bosi facu lompiri in su spogliatoiu unu pullman de feminas’”.
Is fueddus de Berlusconi, pigaus de unu videu, ant inderetura fatu su giru de su web e ce dd’at fata a fairi inchietai a totus.
“Fueddus miserus e perigulosus” tronat sa deputada de is Steddaus Chiara Appendino. “Eita ndi pensat Giorgia Meloni? Nosi citeus e feus passai custu messagiu a is figlias nostas? Podit essiri ca is feminas tengiant custu cunsideru? Premius de donai comenti chi siant cosa de comporai in su mercau?”.
“Fueddus indignus, volgari sessismu umperau po fairi erriri”, is fueddus de Laura Boldrini.
Marcu Grimaldi de is Birdis-Manca italiana: “Senadori, Presidenti de su Consigliu beciu, e po mesis candidau po fairi su presidenti de sa Republica de Meloni e Salvini. Una bregungia po totu is italianas e italianus, non si podeus abituai a custa volgaridadi”.
Su leader de Fortza Italia e presidenti de su Monza at arrespustu cun d’unu post in Instagram: “Francamenti non pensaia, e nemus ddu podiat pensai ca is fueddus brullanus, ma craramenti foras de conca, chi apu nau a is giogadoris, funt stetius cumentaus in manera mala e banali. Mi faint pena custus criticus. Forsis ddis mancat unu pagu de ‘humor’. Ma seus in tempus de Paschigedda e tandu augurius a issus puru”.
Ma non si podiat fairi ca a fueddus macus origas surdas?
Màuru Mura
Cenarba, su 16 de Mesi de Idas de su 2022
Foto: https://www.sportmediaset.mediaset.it/foto/calcio/l-esordio-di-berlusconi-al-monza_1023155-2018.shtml
