Cerimonia de su campaneddu in Villa Devoto po su mudamentu de presidenti intru de Christian Solinas cun Alissandra Todde. Is dus si funt atobiaus e ant chistionaus intru de issus po prus de duas oras. In custu tempus su governadori beciu e sa presidenti noa ant chistionau de “is problemas prus mannus”, comenti ant nau, ambos, a sa bessida de s’atobiu, cun is giornalistas. Non si funt presentuas paris, ma unu a sa borta.
“Acabbat unu tempus chi apu biviu cun sa spera e sa gana de fairi su doveri miu. Apu sempiri cicau de fairi is cosas cun disciplina e onori”, at nau su presidenti beciu Christian Solinas, “eus chistionau in manera crara e dd’apu fatu is augurius po fairi unu bonu trabagliu in s’interessu mannu de sa Sardigna”.
Solinas at finas nau ca pensat siat “giustu” a tenni atras pensadas de parti de chini at bintu is eletzionis, massimamenti po cantu pertocat is decisionis chi ant essi pigadas in pissu de is spidalis nous, chi issu iat airi bofiu, ma chi parit non pragiant a sa Todde. E in prus de sa sanidadi “eus chistionau de totu, a partiri de is trasportus, de industria, de su personali e de atras cosas comenti cussa de is bonificas in La Maddalena e po su faimentu de caminus”.
A pustis at chistionau sa presidenti noa: “Eus chistioanus de totu cussu chi pertocant is problemas primus de sa Sardigna”, at nau sa Todde, “e Solnas s’est postu a dispositzioni po is cidas chi benit, in manera chi s’agatit sa continuidadi in pissu de is scadentzias e is abbisongius chi depeus portai a innantis”.
In urtimu atrus fueddus: “Deu non m’apa abarrai innoi in Villa Devoto, ma in viale Trento. Pensu chi siat de importu a s’amostai e tenni sempiri un’ogu atentu in is uficius e in is diretzionis. Bogliu essiri una presidenti operativa”.
C’at essi continuidadi cun cussu chi at portau a innnatis Solinas? “Soi cuntenta po su scioberu de su comissariu po is bonificas in La Maddalena: est caminu chi ap’a sighiri”.
Màuru Mura
Lunis, su binticincu de martzu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto:https://www.regione.sardegna.it/notizie/regione-questo-pomeriggio-a-villa-devoto-il-passaggio-di-consegne-fra-solinas-e-todde
