Is provincias sardas, ponendu a un’ala Aristanis, godangiant calencuna positzioni in sa classifica, chi dogna’annu benit fata, de sa calidadi de sa vida, ma abarrant, su matessi tra is urtimas.

Non podiat essiri chi de aici in sa relata fata de ItaliaOggi cun s’Universidadi La Sapienza de Roma, che bidi unu divariu mannu mannu intru de su Nord e su Sud de s’Italia. Peruna provincia meridionali e mancu un’Isula est in is primas trintaduas positzionis. A innantis de totu agataus Trento, gratzias a otu de is noi mesuras pigadas. In coa, e po urtima Crotone.

Sa meglius calidadi de vida in Sardigna est in su Casteddaiu, provincia chi s’agatat in sa positzioni setantadus, dus postus a innantis de sa cica fata ocannu passau. In seugus s’agatat Nugoro chi passat de s’otantacincu a cussa de setantaseti. Duas positzions dd’as godangiat finas Tatari, ci passat de s’otantunesimu a su setantanoi. Mali Aristanis, comenti eus nau ca calat de tres positzionis cunfroma a su 2021.

Torrendu a is primas provincias de sa classifica: in segunda e in tertza positzionis ddue funt Bolzano cun Bologna, duncas Firenze calat de duas positzionis e Milano abarrat cuinta. Est Siena sa provincia chi andat prus a innantis: de doxi a ses, e in su mentris Parma calat de su primu postu a cussu de seti. Serranti s primas dexi Pordenone, Trieste e Modena.

In fundu de sa classifica is matessis de ocannu passau: Siracusa 106, Caltanissetta 105, Napoli 104. Perdit caminu meda Torinu, de 19 calat a 35; beni meda Como chi de 62 bessit a 32.

In generali sa calidadi de sa vida est bona in sessantacuatru provincias in pissu de centu e seti. Sa cica ponit in evidentzia comenti is citadis mannas apant tentu prus atentzioni po sa pesta, invecias in su Sud Italia est unu prantu.

Po fairi sa cica si funt postus in cunsideriu afaris e trabbagliu, ambienti, disagiu sociali e personali, istrutzioni e formatzioni, popolatzioni, dinari e errichesa, seguresa, sanidadi e tempus libbertu.

 

 

Màuru Mura

 

 

Lunis, su 7 de Sant’Andria de su 2022

 

 

Foto: https://www.sardegnaturismo.it/it/luoghi/centro/nuoro