Ddu at a innantis sighiu finas a domu e duncas amelessau. Totu custu est sussediu a Mateu Bassetti, s’infettivologo de su San Martino de Genova, cara famada de candu sa pesta de su SarsCov2 at cumentzau a ponni in genugu s’Italia e su mundu intreu. A ddu sighiri e a ddu amelessai est stetiu, dìnnanti eriseru un’omini de corantases annus chi ddu at atobiau in s’orruga e at umperau su telefoneddu po ddu filmai e a bogis ddi naraiat ca “nosi seis bocendu cun is vacinus, as a biri ca bosi dda feus pagai”. Bassetti at cicau de si stesiai e at tzerriau sa Polizia chi est erribada e ant denunciau s’omini po s’amelessu. Is indagadoris de sa Digos funt finas trabagliendu po totu cussa genti chi de mesis meda strobbant Bassetti in is social o in su telefunu.
No est sa prima borta chi Bassetti benit amelessau: “Sigu a ndi erreciri dogan dì de cussus contras su vacinu. Eriseru, in d’una chat in Telegram mi ndi ant nau de dogna colori e ant scoviau su numuru miu. M’ant prenu de messagius, telefonadas e fueddus malus, amelessendu a mei e a sa familia mia. Cussu chi est sussedendu est de foras de conca, iat serbiri chi sa magistradura punat is amelessus, poita no est possibili chi i depat denunciai. Innoi, po mei, seus fueddendu de una truma de genti chi andat in is prassas pighendusidda cun mei e cun is atrus dotoris. Est de macus chi mi depu castiai is palas candu bessu de domu”.
Bassetti est arriolau meda po is manifestadas de is “no-vax” chi sighint in Italia e at nau: “Sa politiga depit pigai positzionis prus craras chi est de sa parti de sa scentzia: o cun chini pensat chi su vacinu est de importu mannu o cun cussus chi narant ca nou. A cussus chi funt contras su vacinu si est aciunta una parti de sa politiga e totu chi de is vacinus faint una gherra po cicai votus. Custu no andat beni poita no agiudat s’Italia”.
Màuru Mura
“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.
Foto: https://www.montallegro.it/specialisti/matteo-bassetti/
