A su Mapei Stadium de Reggio Emilia s’Italia bincit chena problemas medas sa Lituania e sighit su caminu bia sa cualificatizioni po is Mondialis de fubal in Qatar.

Is piciocus de Mancini non si faint aspetai e, a pustis de pagu de su cumentzu de sa partida segnant su primu gol cun Kean. A pustis est unu lituanu chi agiudat is asulus, Utkus, e s’Italia est giai dus a zeru. Totu est in calada e erribant atrus dus gol in su primu tempus e totu cun un’atra borta Kean e Raspadori. In su segundu tempus est Di Lorenzo a segnai e sa partida acabat po 5-0.

De s’atra parti sa Lituania est parta a beru pagu cosa ma sa natzionali italiana, chi pariat orroinada a pustis is partidas cun Bulgaria e Svizzera, torrat a biri sa lugi.

Mancini at cumentzau sa partida cun custus ominis: ) Donnarumma; Di Lorenzo, Acerbi, Bastoni, Biraghi; Pessina, Jorginho, Cristante; Bernardeschi, Raspadori, Kean.

Sa Lituania at arrespustu cun: Setkus; Lasickas, Klimavicius, Utkus, Slavickas; Dapkus, Slivka; Kazlauskas, Verbickas, Novikovas; Dubickas.

Una de is preguntas de is giornalistas chi ant fatu a Robertu Mancini est comenti ant trabagliau is tres atacantis chi at postu in campu: “Funt piciocus giovunus, bravus a fairi meda cun sa bocia in is peis – at arrespustu s’allenadori –. Tenint feti abisongiu de giogai sempiri e sa spera est chi ddu facant in is scuadras insoru. Oi, a pustis airi tirau in porta po cuatru bortas funt erribaus inderetura cuatru gol, in is partidas cun sa Bulgaria e sa Svizzera eus tirau meda de prus e sa bocia no intraiat. Su fubal est aici. Totus naraiant ca cun sa Lituania ias airi bintu, ma feti su campu ddu podit nai, arregodaisì ca sa Svizzera, in domu sua, at bintu feti po 1-0, non fut facili comenti est partu. Imoi est de importu mannu a binciri cun sa Svizzera, ma giai tengiu fidi”.

 

Màuru Mura

 

 

 

“Attività realizzata col contributo della Regione Sardegna – IMPRENTAS 2020-2021 LR 22/2018, art. 22”.

 

 

 

Foto:https://www.google.de/searchq=italia+lituania&source=lnms&tbm=isch&sa=X&ved=2ahUKEwiIkK3hpvHyAhXvgf0HHWtqBPMQ_AUoA3oECAEQBQ&biw=2481&bih=1301#imgrc=o7NazW_zG5SMGM