“In sa Lega abbisongiat a tenni unu capu nou, chi andit in su caminu de s’autonomia, chi torrat a ponni a su centru de su progetu sa chistioni setentrionali”. Ddu at nau umbertu Bossi, de Gemonio, chi s’agatat in sa provincia de Varese, in ocasioni de sa festa po is corant’annus de su partidu chi issu e totu nd’at pesau.
Po su Senadori est duncas lompiu su tempus chi Mateu Salvini cumentzit a pensai de lassai a atrus sa segreteria de is birdis. Ma a chini podit lassai su cumandu? A unu comenti de Giuannicarrulu Giorgetti? A sa pregunta Bossi arrespundit: “Giorgetti est unu capassu, ma non nau prus de unu fueddu ca chi nde chi no ddu ‘bocint’. Chi a sa genti a su costau de su partidu non pragint is programas non andas de peruna parti. Est comenti is bocias de saboni ca si sciopanti in tempus pagu.”.
“Oi soi cuntentu e allirgu meda ca apu bidu genti chi non bia de annus meda. Est custa sa Lega de su cumentzu”, at aciuntu Bossi, atobiendu is militantis chi si funt amostaus in Gemonio po festai custu anniversariu de importu.
“Salvini at pigau cussu caminu – at sighiu Bossi – dognunu de nosu pigat unu caminu, abbisongiat unu pagu de conca. Sa Lega de tandu teniat is arreignis in sa genti, est a pensai ca in su consigliu comunali de Varese si chistionaiat in lombardu. Chi is arreiginis funt fortis est dificili chi si frimint. De seguru nd’eus pesau una fortza politiga manna. Fut unu mundu chi mudaiat e si teniat abbisongiu de calencuna cosa de nou e bastaiat a castiai beni is cosas po ddu cumprendiri. Tandu seus nascius nosu”.
“Oi – at acabbau de nai Bossi – serbit un’atru corpu de pala po mudai sa situatzioni, sa Lega depit essiri a ddu fairi”.
A is fueddus de Bossi non s’est fata aspetai s’arrspusta de Mateu Salvini, su segretariu de oi de sa Lega: “A is fueddus de Bossi dongiu atentzioni manna de trint’annus. Ndi chistionu finas in su libru miu chi ata bessiri a acabbu de mesi. Ddu ascurtu de sempiri, ma sa cosa chi mi fait prus prageri est ca ddu agatu in saludi e pensu chi siat su prus bellu arregalu po custa festa”.
Màuru Mura
Sabudu, su trexi de arbili de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.velvetgossip.it/2019/02/18/umberto-bossi-dopo-il-duro-colpo-di-salute-i-medici-si-e-svegliato/
