Beniaminu Zuncheddu no at bociu a nemus e torrat a essiri un’omini liberu. Custa est sa sententzia de su tribunali de Roma chi at bortulau cussu chi iant decidiu in Casteddu. Duncas, a pustis prus de trint’annus passaus in presoni, su pastori de Burcei podit aboginai a totu su mundu de essiri innocenti. Ma in bidda sua ddu sciant giai poita cuss’omini non podiat essiri unu bocidori. Incurpau de airi bociu tres personis in Sinnia, Beniaminu at sempiri nau ca non c’intraiat nudda, ma cun dd’unu indagu a cussa manera, cun testimongius fartzus e cun sa gana de sa giustissia de fairi pagai cussu bocidorgiu legiu, at pagau po totus. Sa beridadi de s’innocentzia de Zuncheddu est bessia a foras, ma ancora, e de seguru at essi aici po sempiri, nemus at pagau po airi bociu a Gesuinu Fadda de cincuantases annus, su figliu Giusepu de binticuatru e Ignatziu Pusceddu de cincuantacincu cuss’otu de gennargiu de su 1991.

De tantu Beniaminu Zuncheddu s’est agatau in presoni po pagai una curpa chi non teniat e nemus dd’at a podiri torrai is annus perdius. Miniscimentu mannu est cussu de s’abogau Màuru Trogu e de su partidu Radicali, ch s’ant pigau a coru custu contu de mala giustissia. Ce dd’at fata, s’abogau casteddaiu, a torrai a fairi processai su pastori de Burcei e a ddi donai dignidadi. Nemus de is parentis de Zuncheddu iat cretiu a cussu chi sa giustissia iat fatu creiri e funt sempiri abarraus a su costau sou.

In manera giusta immoi at essi pediu dinari a su Stadu Italianu, ma cussu chi at a lompiri in is buciacas de Beniaminu Zuncheddu no at a serbiri a nudda chi non po ddi fairi passai una beciesa cun serenidadi. Sa dignidadi no dda iat mai perdia, nemancu in presoni ca at sempiri nau de essiri innocenti. Un’omini cun sa schinta ereta, custu est Zuncheddu. Calencun’atru, chi si boliat postu in pumus artus, no ddu podit nai.

Chi sa saludi t’alloghit, Beniaminu stimau, e sa vida ti dongiat allirghia e cuntentesa po s’orrestu de is dis.

 

Màuru Mura

 

 

 

Dominigu, su bintotu de gennargiu de su 2024

 

 

 

Attività realizzata col contributo della Regione Sardegna – Imprentas 2023-2024. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://www.ilfattoquotidiano.it/2024/01/26/beniamino-zuncheddu-assolto-dopo-33-anni-di-carcere-la-fine-di-un-incubo-la-sentenza-del-processo-di-revisione-per-la-strage-di-sinnai/7424057/