Trint’annus a eriseru, su 17 de frargiu de su 1992 beniat acapiau e postu in presoni Màriu Chiesa. Est una dì nodia, ca de tandu si fait acabai sa “Prima Repubblica”. Chiesa cumentzaiat a fairi nominis de politigus chi pigaiant dinari de is imprendidoris e beniat impresonada genti meda.

“No est una dì de festai. Funt passaus trint’annus, ma oberendu unu giornali dogna dì, a totus parit chi non siat mudau nudda e totu assimbigliat a cussu chi sussediat a innantis. Antzis, est a nai, ca imoi totus funt prus abistus”. Ddu scrit Antoni Di Pietro, su prus famau de cussus magistraus chi indagaiant in Milanu.

Di Pietro torrat a cussu tempus: “Nosi boliant frimai. Si funt postus in motu comenti ant cumprendiu ca fustis po lompiri a is ominis prus potentis. ‘Mani Pulite’ dd’ant frimada finas poita fustis de indagu in pissu de is sennoris de su Nord e seus andaus a scutulai cussus chi funt in relata cun sa mafia in sa parti bascia de s’Italia”.

“De tandu – sighit a scriri Antoni Di Pietro, chi a pustis est diventau politigu famau cun Italia dei Valori – sa sola cosa chi est mudada est ca imoi po sa genti est cuasi normali chi totu sussedat. De s’acabu de sa ‘Prima Repubblica’ si depiant pesai pensamentus e ominis e feminas chi depiant cambiai s’Italia. Invecias de cussu indagu s’est pesau unu sbuidu mannu de ideas e funt benius a campu genti chi est abarrada a fairi politiga prus po issus e totu chi po is atrus. Candu nau custu pensu a Berlusconi, Bossi, Salvini e Renzi”.

Sufrit Di Pietro candu si pregontat: “Eus fatu cussu chi fait unu dotori candu cumpudat unu malaidu. Eus bistu ca s’Italia fut una natzioni malaida de corrutzioni. Funt una bregungia is furonis, chini imbrogliat cun is tassas, is mafiosus o chini, comenti nosu, ddus at bogau a pigliu cun su indagu de ‘Mani Pulite’?”.

A s’acabu una improntzia: “A innantis de mi morri ia bolli ponni totu in internet aici totus podint ligiri e connosciri sa beridadi, ca est de un’atra manera de cussa chi nos ant contau”.

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

 

Foto: https://tg24.sky.it/politica/2022/02/17/tangentopoli-antonio-di-pietro