A pustis prus de unu mesi acabat su contu de sa familia, ch bivit in Roma, chi fut frima in Salighera de su tempus de Paschigedda. Funt frimus ca tenint unu piciocu de dixiaset’annus chena vacinu, ca non ddu podiat fairi po mori de atrus problemas de saludi, e duncas chena Green Pass: non pidiat pigai né sa navi e né s’aparechiu.

Su diretori generali de su ministeru de sa Saludi, Giuanni Rezza, at autorizau su piciocu de podiri viagiai: depit tenni unu tamponi fatu sonumancu corantot’oras a innantis, chena essiri impestau, candu partit e atrus dus tamponis candu erribat, unu a intru atras corantot’oras e un’atru a pustis centubint’oras.

Sa familia de Roma fut erribada in Sardigna po festai sa Paschigedda paris a sa familia de sa mamma chi est tataresa. Depiant torrai a domu insoru s’otu de genanrgiu, ma pobiddu e pobidda si funt impestaus e ant depiu aspetai de curai. Candu totu pariat passau est intrada sa lei, su dexi de gennargiu, de tenni su “Super Green pass” po podiri andrai de una parti a s’atra.

In su fratempus in Sardigna atrus cincu mortus de pesta e atrus 2.069 impestaus in sa dì de eriseru, po cussu chi si ligit in su bulletinu regionali, chi de dus annus a imoi nosi fait cumpangia. Is tamponis fatus funt 12.337 e duncas sa percentuali de impestaus est de su 16,7%.

S’abbasciat su numuru de chini s’agatat in sa terapia intensiva, imoi funt binticincu contras is bintotu de sa diì a innantis e finas in is atrus aposentus de is spidali su numuru est prus basciu: si passat de 397 a 387. Incungiaus in domu funt 36.023.

Is mortus de eriseru funt un’omini de sessantatres annus e una femina de norantaseti chi biviant in sa provincia de su Sud Sardigna, un’omini de setantases annus de sa Citadi metropolitana de Casteddu, una femina de otantases annus e un omini de norantatres chi biviant in sa provincia de Tatari.

 

 

18 de friargiu de su 2022

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

 

Foto: https://www.adnkronos.com/green-pass-italia-da-domani-nuovi-obblighi-e-regole_285rKxdwhmrW71k2Fr4QdS