Su Consigliu Regionali sardu s’at a torrai a atobiai sa cida ch’intrat, est probabili meda chi at essi lunis, su bintidus de arbili.
S’atobiu de dus de sa legisladura de Alissandra Todde, chi nd’est bessia bincidora de sa cuntierra cun Paulu Truzzu su binticincu de friargiu passau, at essi intregada massimamenti a ponni in peis s’Uficiu de Presidentzia, est a nai a ponni ses consiglieris chi ant agiudai su trabagliu de su Presidenti de su Consigliu etotu, po is cinc’annus benientis.
A pustis s’atobiu de martis passau, su noi de arbili, cun is doixi assessoreis nous de sa Giunta de Alissandra Todde e su presidenti de s’Assemblea Pieru Cumandini, s’atobiu de dus at a serbiri po is cadiras de numuru dus de su Consigliu, de tres custoris e de unu segretariu. Is numurus dus depint essiri dus (unu de sa parti chi at perdiu sa torrada eletorali) e is custeris, invecias, tres e unu depit essiri, sempiri de is consiglieris chi ant curtu cun Paulu Truzzu.
Abbarrendu in sa parti de sa Todde, su numuru dus de Pieru Cumandini iat podit essiri Giusepu Frau, chi curriat po sa lista “Uniti con Alessandra Todde” o forsis Larentu Cozzolino, su consiglieri prus beciu chi at ghiau su Consigliu Tegionali in su primu atobiu, chi curriat cun su Partidu Socialista, ma, po cussu chi bessit a campu, sempiri prus acanta a “Orizzonte Comune”. Ambos, in sa vida insoru, funt dus dotoris e, sempiri po cussu chi si scit, currrint finas po sa cadira de sa cumissioni de sa Sanidadi.
Po su numuru dus de Comandini parit finas in cursa su consiglieri de is Steddaus Alissandru Solinas.
Su Campu Largu at a podiri ponni s’indicu, comenti eus nau, finas po dus de is tres cuestoris. In custa chistioni is nominis prus fortis funt cussus de Giusepu Dessena, Walter Piscedda e Antoni Solinas. Su primu de “Alleanza Verdi Sinistra” e is atrus dus de is Democratigus.
Màuru Mura
Martis, su seixi de arbili de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://old.regione.sardegna.it/regione/consiglio/
