A prus de cincuan’annus de sa cundenna, po essiri incurpau de airi bòciu cuatru personis, in dd’una de is chistionis prus connotas in Giaponi, unu tribunali at oi decidiu de assolviri unu pugili professionista chi oi tenit otantot’annus. Su processu nou a Iwao hakamada – chi at passau corantases annus in presoni, a innantis chi provas noas ddu ant fatu bessiri de presoni in su 2014 – fut cumentzau in su mesi de talamini de ocannu passau in sa corti de Shizuoka, cun is pubricus ministerus chi pediant sa cundenna a morti. Est sa borta de cincu chi in Giaponi, de su pustis guerra a immoi, chi is processus torraus a fairi, acabbant cun s’assolutzioni a pustis essiri cundennaus a morti.

Po corantases annus, dogna dì, Hakamada at erriscau de essiri portau in s’aposentu de s’impicadorgiu. Finas a oi fut s’omini chi prus a longu at aspetau de essiri bòciu in totu su mundu. “Fut”, poita de oi si podit nai un’omini liberu: su processu nou ddu at assolviu, ponendu aici in crisi sa filera giuditziaria e sa cundenna a sa morti in su Gaiponi.

Immoi, sa crobba si spostat in sa possibilidadi chi is pubricus ministerus facant arrecursu, un’atra bia, a sa sententzia de su processu nou. In is urtimus noi annus, faint sciri is giornalis e is televisionis de su Giaponi, Hakamada est spaciau po mori de su tempus passau in presoni, ma giai de su 1980 fut aici, candu, est a nai, sa chistioni in pissu de sa cundenna a morti fut serrada. Sa sorri, chi tenit prus de norant’annus, at sempiri presentziau a is udientzias po contu de su fradi.

Su, tandu, boxeri, trabbagliait in dd’una sienda candu fut stetiu acapiau in su 1966 po sa curpa de airi bociu su meri de trabbagliu, sa pobidda e dus figlius insoru. Iant agatau is cuatru, mortus a gorteddadas, in sa domu de sa prefetura de Shizuoka, chi, dapoi dda iat papada su fogu. Incurpau de su bocidorgiu, a su cumentzu s’omini iat amitiu is curpas, a sighimentu de is torturas, ma a su processu iat nau de no airi fatu nudda. Po cussu chi narat s’abogau Teppei Kasai, de human Rights Watch Asia, intendiu de s’agentzia Afp, su contu de hakamada est “feti unu de is contus meda de sa filera de giustissia giaponesa cun is incurpaus chi benint torturaus”.

 

 

 

 

Màuru Mura

 

 

 

Giobia, su bintises de cabidanni de su 2024

 

 

Attività realizzata col contributo della Regione Sardegna – Imprentas 2023-2024. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://www.today.it/mondo/iwao-hakamada-assolto-56-anni-pena-morte-giappone.html