A pustis su paregiu de eriseru a mericeddu in Salerno sa situatzioni de su Casteddu po cicai de non ci calai in Serie B est ancora posta mali. A is piciocus de Agostini no iat bastai nemancu a binciri is urtimas duas partidas contras s’Inter e su Venetzia, chi in su fratempus sa sas Salernitanta bincit in Empoli e cun s’Udinese.

Su Casteddu abarrat a suta de unu puntu de is campanus. A su gol de su vantagiu de sa Salernitana, fatu de Verdi a medtadi de su segundu tempus cun d’unu rigore at arrespustu unu corpu de conca de Altare candu sa partida fut giai acabendu.

Immoi iat serbiri una vitoria contras de is Campionis de s’Italia de s’Intere chi non podint non binciri chi bolint gherrai ancora po su scudetu. Duncas conca-coa dominigu in Casteddu.

Alisandru Agostini, tzerriau feti sa cida passada po cicai de sarvai su chi si podit sarvai, partit de su gol de Altare a unu minutu de s’acabbu de sa partida: “Cussu gol est grai meda, nosi donat sa fortza po sighiri a ci creiri finas a s’acabbu. Seus in vida e custu est sinnu de importu mannu”. Altare “at fatu una partida de grandu giogadori, comenti totu s’orrestu de sa scuadra. Tenit gana e barra. Ma podit diventai ancora meglius” Su gol de custu piciocu at torrau a ponni in cursa su Casteddu ca pariat spaciau in s’inferru de sa Serie B. “Nosi donat spetu bonu e nos atacaus cun totu sa fortza nosta a sa spera”.

Finas po su capitanu Joao Pedro una lugi pitica est ancora alluta: “Su mister a s’acabbu fut cuntentu e nos at batiu is manus, poita sa scuadra, a suta de unu gol ddu at cretiu finas a sa fini e ddue iat gana de ddue creiri”. Immoi atras duas partidas: “Candu erribas a custu puntu non t’intendis stracu, serbit feti a ponni sa camba e binciri, poita totus ndi boleus bessiri de custa situatzioni. Agostini nosi connoscit, nosi biat dogna dì e connoscit aunia est erribau”.

 

 

 

Màuru Mura

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

 

https://www.youtube.com/watch?v=05MuQzw9esQ