Donald Trump est lompiu, at bidu e at bintu. E sa Nato at a sighiri a biriri. S’acordiu de ndi pesai is spesas militaris a su 5%, in su famau cumpartzimentu de su 3,5+1,5 po centu, ddu ant aprovau de is capus europeus, comenti si sciat giai in is dis passadas.
Cussu chi est scritu est ca “is alleaus ant a ponniri sonumancu su 3,5% de su Pil de dogn’annu, a intru de su 2035, po finantziai sa Nato”.
Si ponit a un’ala Pedro Sanchez cun sa Spagna, poita narat chi est giai meda cussu chi ponit immoi, est a nai su 2,1%. Inchietu su presidenti de is Stadus Unidus, chi a dogna manera no at fatu sartai s’acordiu, ma narat: “Est legiu meda, non bolit pagai sa parti sua, ddi eus a ponni is datzius a duas bortas”. Madrid no est abarrada a sa citia e at inderetura arrespustu ca “Is atobius in pissu de is datzius si faint cun s’Unioni Europea”.
Cincu funt is chistionis aunia, a is cumandus de is Stadus Unidus, ant arrespustu “ca giai”. Sa Russia benit lamada “un’amelessu po tempus meda”, ma peruna arma s’at a moviri in sa guerra in ucraina, po non strobbai su processu de pagi pensau de Trump. Is alleaus, dapoi, “torrant a donai s’impignu insoru po agiudai s’Ucraina” chi bolit nai, ponendu a un’ala su “politichese” ca dognunu at a fairi comenti disigliat, prus de totus is americanus, ma a sa matessi manera sa pensada de “su caminu chena torrai a coa”, bia sa Nato, sparessit de su totu, comenti pediu de is Stadus Unidus. “De seguru sa Russia at a castiai cun interessu, poita po issus is paperis contant meda de prus de feti is fueddus”.
Zelensky, a s’imbessi de cussu chi fut sussediu in su G7, est arrennesciu a atobiai Trump e at nau de essiri cuntentu: “Eus fueddau po tempus meda e cun spera. Eus fueddau de totu is chistionis de importu mannu”. Su matessi at nau Trump: “Non podiat andai meglius ca Zelensky bolit lompiri a s’acabbu de sa guerra”.
Màuru Mura
Giobia, su bintises de làmpadas de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.alanews.it/esteri/spagna-sanchez-risponde-a-trump-sui-dazi-negozia-bruxelles-a-nome-di-tutti/
