Su Comissariu de sa Natzionali italiana de basket at donau fidi, un’atra borta, a su play tataresu Marcu Spissu e a s’ala terranoesa Gigi Datome.
Is dus giogadoris sardus funt intru de is dixiaseti lamaus in natzionali po s’allenamentu chi at andai a innantis de su 3 a su 10 de austu in Pinzolo in Val Rendena. S’atobiu in Trentino at a serbiri po aprontai is duas partidas de cualificatzioni a su mondiali de su 2023, de su 24 a su 27 de austu, e de s’EuroBasket 2022 chi s’at a giogai de su primu a su 18 de Cabudanni e s’Italia dd’at a giogai in Milano de su 2 a s’8 de su matessi mesi. Intru de is lamaus finas atrus dus giogadoris chi ant giogau po sa Dinamo: su centru Tessitori e s’alapivot Polonara.
Cunfrontas a sa scuadra chi at bintu cus is Paesi Bassi su 4 de orgiolas passadas, torrant Danilo Gallinari e Nicolò Melli, Nico Mannion, Grabieli Procida e Mateu Spagnolo.
De fatu de su Trentino sa scuadra at andai in Bologna po si giogai una partida, in amistadi, cun sa Francia, cenarba su 12 de austu a is otu e mesu de merì. A pustis ant a torrai bisita a is francesus in Montpellier e in segus s’ant a agatai in Amburgo po sa semifinali contras de sa Serbia su 19 de austu e, chi bincint, contras o sa Germania o sa Republica Ceca su binti de austu etotu.
Is giogadoris lamaus de Pozzecco funt custus:
Amedeo Della Valle (1993, 194, G)
Marco Spissu (1995, 184, P)
Niccolò Mannion (2001, 190, P)
Paul Biligha (1990, 200, C)
Stefano Tonut (1993, 194, G)
Danilo Gallinari (1988, 208, A)
Nicolò Melli (1991, 206, A)
Simone Fontecchio (1995, 203, A)
Amedeo Tessitori (1994, 208, C)
Giampaolo Ricci (1991, 202, A)
Matteo Spagnolo (2003, 194, P)
Tommaso Baldasso (1998, 192, P)
Achille Polonara (1991, 205, A)
Gabriele Procida (2002, 201, G/A)
Alessandro Pajola (1999, 194, P)
Luigi Datome (1987, 203, A)
John Petrucelli (1992, 193, G/A)
15 de triulas de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”
Foto: https://www.google.com/search?q=pozzecco&source=lnms&tbm=isch&sa=X&ved=2ahUKEwiSv4edpfr4AhUSYPEDHdlgDx4Q_AUoA3oECAIQBQ&biw=1920&bih=872&dpr=1#imgrc=7twJPrhYvVnj4M
