“Cancuru e diabete non funt maladias diversas intru de sa terra sarda e cussa italiana”

Aici Armandu Bartolazzi, oncologu romanu de sessantatres annus e assessori a sa Sanidadi in Sardigna, po parti de is Steddaus, arrespundit a is fueddus in pissu de su scioberu de unu non sardu po ghiai s’assessorau prus diligu de sa Giunta Todde. E cicat finas a Gigi Riva, nendu “Ca finas Riva non fut sardu e a pustis s’est bidu comenti est acabbada”.

E at aciuntu: “Forsis finas deu iari tentu custu cunsideru in pissu deu unu strangiu in terra sarda, ma calencuna de is maladias prus cumunas non funt diversas intru de Sardigna e s’orrestu de s’Italia. Su problema est ca, finas chi funt ogualis is maladias, in Sardigna si fait adduru a dd’as arreconnosciri”. “Po custu”, sighit a nai Bartolazzi, “pensu chi siat unu valori aciuntu unu chi lompit de su continenti e podit castiai cun atrus ogus”. S’assessori, in segus, tenit sa spera de essiri agiudau finas de sa minorantzia: “Su cancuru non tenit colori politigus, aici comenti non s’agatat unu diabete de drestra o de manca. Deu m’auguru de tenni agiudu de importu de totus”.

De s’atra parti, inderetura, arrespundit a Bartolazzi po is fueddus chi at umperau ponendusì cunfromma a Riva. Ddu fait Ugo Cappellacci, chi de sa Regioni sarda est stetiu presidenti.

“Armandu Bartolazzi, si paragonat a Gigi Riva? Forsis non tenit a intru s’umiltadi chi invecias fut a intru de is intragnas de su campioni nostu”, at nau su deputau de Fortza Italia. Aciungendu dapoi: “Su solu Gigi de Bartolazzi est di Maio chi ddu boliat comenti de Ministru de sa Sanidadi”. Duncas, serrat sempiri Cappellacci “lassit a nosu sardus su Gigi nostu e issu si podderit su sou”.

Sa nomena de Bartolazzi at lassau a buca oberta prus de unu de s’opositzioni. Ma, est a nai puru ca forsis serbiat unu chi lompat de foras, po ponni a un’ala is interessus mannus de sa sanidadi.

 

 

 

Màuru Mura

 

 

 

Giobia, s’undixi de arbili de su 2024

 

 

Attività realizzata col contributo della Regione Sardegna – Imprentas 2023-2024. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

Foto: https://www.youtube.com/watch?v=AY0SDoA-sSU