Martina Oppelli, femina triestina de cincuant’a morriannus, malaida de sclerosi multipla de prus de bint’annus, est morta s’atru mengianu in Svitzera, aunia s’est possia bociri cun s’agiudu de is dotoris. Ddu fait sciri su sotziu intregau a Luca Coscioni. Su cuatru de làmpadas passau s’Azienda sanitaria universitaria de Trieste ddi iat nau ca nou po sa borta de tres po si podiri bociri in Italia.

Po s’Azienda sanitaria – narat su sotziu Luca Coscioni – Oppelli “non fut curada po dda fairi abarrai in vida, ma dipendiat in totu po meiginas, catetere e machina de su tussi”. Po custa arregioni su 19 de làmpadas passau, agiugada de sa truma de abogaus ghiada de Filomena Gallo, abogada e segretaria natzionali de sa Luca Coscioni, iat nau ca nou a su “no” de sa matessi Azienda sanitaria. “Martina Oppelli at decidiu de andai a morri in Svitzera poita non fut possibili aspetai ancora un’arrespusta in Italia. Est de nai finas ca is suferentzias de Martina non si podiant prus poderai”, narat Filomena Gallo. Atras trintunu personis ant agiudau, cun logu po dromiri o dinari, sa Oppelli a morri. “Is nominis insoru ant essi fatus connosciri”, narat ancora sa segretaria natzionali de su Sotziu Luca Coscioni.

“Parlamentaris e italianus totus – is fueddus de Martina Oppelli in dd’unu videu fatu in Svitzera pagu a innantis de morri – no sciu chi bos arregodeis de mei, soi Martina Oppelli. Est giai de prus de un’annu, chi bos ia pediu una lei po sceberai de acabbai de biviri po totu cussa genti malaida chi non ce dda fait prus a andai a innantis. Ma is fueddus mius non funt serbius a nudda. Giai de dus annus, boghendu a pigliu sa ‘sententzia Cappato’, apu pediu de tenni dotoris a su costau po dd’acabbai de biviri. Sa Regioni mia, po tres bortas, at nau ca nou. Non tengiu tempus de aspetai ancora una spusta e mi ndi soi benia in Svitzera. Ma poita depeus andai in logu strangiu, poita depeus pagai e fairi unu caminu chi nosi stracat meda?”.

 

 

 

 

 

Màuru Mura

 

 

 

Mercuris su trinta de triulas de su 2025

 

 

Attività realizzata col contributo della Regione Sardegna – Imprentas 2024-2025. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018

 

 

Foto: https://www.corriere.it/cronache/25_luglio_31/suicidio-assistito-martina-oppelli-morta-svizzera-b3cfc7d6-90f2-4e0b-8707-7f5de1a34xlk.shtml