Is giogadoris prus fortis de su Casteddu, che c’est calau in Serie B, sighint a abarrai intru de is obietivus de su Monza de Sirviu Berlusconi, chi a s’imbessi, est apena bessiu po sa prima borta in sa storia in Serie A.
Po su chi si narat sa scuadra lombarda iat a bolli non feti Joao Pedro (chi pariat essiri giai de su Torinu) e Nahitan Nandez , ma finas su portieri Alessiu Cragno.
A su Casteddu serbit dinari friscu e bendenduru custus tres nd’iat erribai meda de averas: feti su “bomber” de El Leon balit meda e a custus si podit aciungiri finas Andria Carboni, chi at firmau po su Casteddu finas a su 2027, ma chi bolint is duas sociedadis giai agatant s’acordiu.
Iant essi aici cuatru is giogadoris chi de Casteddu si movint in Brianza.
MarKo Rog puru non si dda intendit de abarrrai ca si iat a bolli giogai su mondiali de su Qatar, chi s’at a agiogai de su 21 de Sant’Andria finas a su 18 de mesi de Idas, e cicat calencuna scuadra chi di permitat de abarrai a suta is lugis de scuadras famadas.
Ma Rog tenit unu bonu coru e iat torrai gratzias a is sardus andendusindi feti po un’annu. Uficialis atrus dus giogadoris chi no ant essi de su Casteddu in su benidori: Vicario e Simeone po immoi abarrant a s’Empoli e a su Verona.
Unu de is giogadoris chi ant sarvau sonumancu sa faci in s’urtimu campionau est de seguru Alisandru Deiola, chi iat podit essiri finas su capitanu de sa scuadra noa chi tocat a fraigai. “Tenit su coru sardu, no at essi unu de is meglius tecnicamenti, ma tenit totu cussu chi serbit po giogai e cicai de torrrai a portai su Casteddu in Serie A”, is fueddus de su diretori sportivu Capozucca. Issu e pagus atrus funt segurus de abarrai in Sardigna. A ppustis is bessidas de Ceppitelli, Lykogiannis, Strootman, Lovato, Keita Baldé e Dalbert e Bellanova, finas Pavoletti, Cragno, Marin e Joao funt andendusindi.
Po is giogadoris chi ant a lompiri po immoi si chistionat feti de Lapadula ca cun Liverani, candu funt paris in su Lecce iat fatu undixi gol in binticincu partidas.
20 de làmpadas de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”
Foto: https://www.corriere.it/sport/20_ottobre_27/lapadula-peru-il-tatuaggio-sbagliato-bomber-chiede-cittadinanza-giocare-mondiale-3e3ded66-1826-11eb-8b6a-8e17b1e81f26.shtml
