Funt cumentzaus is atobius eris a mengianu, de is degi, intru de su presidenti de sa Republica Sergiu Mattarella cun in fortzas politigas. Is primus a essiri imbucaus funt stetius is presidentis de Senau e Camera: Ignatziu La Russa cun Larentu Fontana. A sighiri is rapresentantis de Birdis-Manca, Atzione-Iv, Steddaus e Partidu Democratigu. Oi invecias est su turnu de totu su centrudrestra, chi a su Quirinali at a bessiri cun is ominis de Fradis d’Italia, Lega, Fortza Italia e Moderati.

S’incarrigu iat essi possiu donai giai de custu merì.

Sa Meloni eris at scritu in Twitter: “Cras, paris a totu sa coalitzioni, eus a bessiri a su Quirinali po s’atobiu cun su Presidenti de sa Republica Mattarella. Seus prontus a donai a s’Italia unu Guvernu chi dongiat inderetura mesuras cun cumpetentzia e cuscentzia po cicai de binciri is urgentzias chi teneus”.

Candu eris Erricu Letta est bessiu de s’aposentu de Mattarella s’est frimmau cun is giornalistas: “Eus nau a su Presidenti de sa Republica ca eus a fairi un’opositizoni seria e chena scontus perunu, massimamenti in tres chistionis chi pensaus siant is prus urgentis: trabbagliu, diritus e ambienti”. Letta, a cantu narat issu, est arriolau po sa politiga estera e is fueddus de Sirviu Berlusconi at nau ca is dem non ant acetai peruna duda in pissu de is chistionis de is diritus, ma funt prontus a chistionai po calencuna cosa de cambiai in sa Costitutzioni. “Deu soi cunvintu ca in custa legisladura, a pustis una campagna eletorali aunia is opositzionis funt andas pratzias, ci bogliat unu caminu paris, chi non si bolit chi sa legisladura durit cinc’annus cun su matessi guvernu. Calencunu passu a innantis ddu eus fatue teneus su pensamentu de sighiri custu caminu. Ma nosu seus is solus in s’opositzioni chi si dd’ant pigada cun issus e totu. Cun su cungressu chi eus a fairi eus a ponni sa chistioni po andai prus de acordiu cun totu cussus chi s’agatant a difendiri”.

 

 

Màuru Mura

 

 

Cenarba, su 21 de mesi de ladamini de su 2022

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

Foto: https://www.ansa.it/sito/photogallery/primopiano/2022/10/20/consultazioni-al-quirinale-la-fotodiretta_f373e0c4-1185-4c27-9856-7f539ba9ef09.html