Funt partius in duamila de prassa Garibaldi, in Casteddu, ma funt lompius, cun is cantadas de “Bella Ciao”, in degimila in prassa de su Carmini po arregodai su 25 de arbili, sa dì de sa Liberatzioni in Italia de su nazifascismu.

Giovunus, pipius, mannus becius ant passillau intru de is orrugas prus de importu de sa citadi, portendu a una manu is bandelas de s’Anpi, de sa pagi, de is bator moriteddus e de sa Cgil. Non podiant mancai cussus chi s’interessant de sa Palestina, ma finas atrus sotzius medas, intru de custus cussus chi gherrant dogna dì contras de “s’eolicu” in Sardigna. E si ddue agataiat finas su sotziu “Non una di meno”.

In pissu de su palcu de prassa de su Carmini si chistionat de trabbagliu, diritus e libertadi. In prassa, intru de genti meda, cun sa bandela de sa pagi in manus, finas Sonia Aquilotti, otantot’annus, partigianca candu ndi teniat seti cun su nomini de Lilla, lompia in s’Isula in su 1946.

Est a nai ca su poderi tedescu e fascista in Italia no est acabbau in feti una dì, ma su 25 de arbili est sa data simbolica poita in su 1945, cussa dì, est cumentzada s’arretirada de parti de is sordaus nazistas e fascistas de sa Republica de Salò, de Torinu e da Milanu, a pustis chi sa genti fut clada in is caminus po rebellia e is partigianus iant aprontau unu progetu po si torrai a pigai su cumandu in is citadis.

Sa prima parti est acabbada in s’orruga de Sonnino, aunia, comenti de sempiri benit posta una corona de froris po arregodai totu is feminas e totu is ominis chi funt mortus po sa libertadi. A pustis finas unu massu de orrosas orrubias e arvas funt stetias postas in sa prassa intregada a Antoni Gramsci, s’intelletuali sardu bociu de su regime fascista.

Sa Presidenti de sa Regioni Sarda, invecias, at festau sa dì de sa Liberatzioni in sa citadi sua, in Nugoro, aunia at finas atobiau su Prefetu Dionisi.

“Oi – at nau sa Guvernadora – est sa dì aunia totu tosu castiaus cun prus fortza is istitutzionis nostras e sa Costitutzioni, pesada de sa libertadi e de aundai contra is pensadas de su fascismu”.

 

 

 

Màuru Mura

 

 

 

Giobia, su binticincu de arbili de su 2024

 

 

Attività realizzata col contributo della Regione Sardegna – Imprentas 2023-2024. Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://www.interno.gov.it/it/notizie/25-aprile-non-solo-memoria-festa-liberazione