Su Presidenti de sa Republica Sergiu Mattarella a torrau a palas is dimissionis de su Presidenti de su Guvernu Mariu Draghi. Su Quirinali at fatu sciri de torrai a fairi is contus e aici at essi fatu mercuris chi benit in Parlamentu. Duncas tra cincu dis Draghi, chi eriseru fut bessiu de Mattarella po si dimitiri, s’at a torrai a presentai in Camera e Senau po torrai a tenni sa fidi. Su 18 e su 19 at a tenni un’atru atobiu de importu mannu po cussu chi pertocat is provistas de su gas in Algeria po lassai a perdiri cussas chi lompint de Mosca.

Po s’indicu de su Quirinali, su Parlamentu at a votai un’atra borta po biri chi su Presidenti possat tenni ancora is numurus po guvernai.

E innoi is partidus politigus si stagliant: de una parti ddu est chini bolit fairi abarrai Draghi in Palazzo Chigi, comenti su Partidu Democratigu de Erricu Letta, de s’atra, invecias, chini at a sighiri a sustenni, comenti fatu in is oras passadas, sa necessidadi de torrai a votai, tra custas Giorgia Meloni chi eris at nau ca custu guvernu est acabau.

Totu est cumentzau mercuris passau candu a totus est partu craru candu s’est obertu su votu po sa chistioni de sa fidi po su Decretu de lei po is agiudus in su Senau. Is Steddaus iant giai nau ca no ddu iant airi fatu. A nudda est serbia sa mediatzioni de su ministru Fideli D’Incà, chi at cumbidau is capustrumas de non donai sa fiducia. No est serbiu a nudda. Is Steddasu ci funt bessius candu funt stetius tzerriaus a votai. 172 cussus chi ant nau ca giai, ma chena is 61 de su Movimentu.

Bistu custu Draghi est bessiu a atobiai Mattarella e a donai is dimissionis. Immoi si nd’at a torrai a chistionai mercuris chi benit.

In totu custu is fueddus de Dmitrij Medvedev, numuru dus de su Consigliu de seguresa russu: “De fatu de Boris Johnson e Mariu Draghi chini at essi s’atru?”.

 

 

15 de triulas de su 2022

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

Foto: https://www.google.com/search?q=parlamento+italiano&source=lnms&tbm=isch&sa=X&ved=2ahUKEwjZgpixn_r4AhWHX_EDHVEXDjMQ_AUoAXoECAIQAw&biw=1920&bih=929&dpr=1#imgrc=W7dBr2g3ft8N8M&imgdii=MMjqN6oJ2A2p-M