Est mortu Eugeniu Scalfari, cussu chi iat fatu nasciri su giornali Repubblica, teniat norantot’annus e sa nova est lompia propriu de is colonnas de su giornali chi iat fatu nasciri.
Fut nasciu su ses de arbili de su 1924 in Civitavecchia, at fatu su giornalista ma finas “S’economista, su politigu, su filosufu, su scritori e su poeta”, comenti arregodant in colonnas de su giornali cosa sua. In is urtimus tempus iat strintu amistadi manna finas cun Paba Franciscu.
Intru de is scitoris chi ddi pragiat prus ligiri ddue funti s romanzus de Pessoa. E de is atobius chi nd’at a sinnai sa gioventudi ddu est, massimamenti, cussu in Sanremo cun Italo Calvino, su cumpangiu de bancu in scola. Imparis fraigant una gramatica de su pensai e de is emotzionis.
In is primus annus de is cincuanta de su seculu colau cumentzat su caminu de giornalista cun “Il Mondo” de Pannunzio e s’”Europeo” de Arrigo Benedetti. In su 1955 cun custu fait nasciri “L’Espresso”, su primu setimanali de indagu italianu. Scalfari ddue trabagliat comenti de diretori aministrativu e collaboradori po s’economia. E candu De Benedetti ddi lassat su cumandu diventat su primu “diretori-manager” italianu, una figura, chi in Italia, po cussus tempus propriu non si connosciat.
In su 1976, de fatu de airi provau, ma chena sucessu, de fairi nasciri unu giornali paris a Indro Montanelli, ca non creiat meda a sa pensada, Scalfari fundat su giornali La Repubblica, chi intrat in is edicolas po sa prima borta su 14 de gennargiu de cuss’annu.
Sa pensada, agiudada de sa truma de s’Espresso e sa Arnoldo Mondadori Editore, operit una pagina noa de fairi su giornalismu italianu. Su giornali romanu, a suta sa ghia sua, lompit a essiri, po tempus meda, su giornali prus ligiu in Italia.
Abarrat comenti de diretori po bint’annus, finas a candu intrat Etzio Mauro. Scalfari non si ponit, a dogna manera, a una parti, poita at a sighiri a scriri comenti de editorialista su dominigu.
Chi sa terra ddi siat lebia.
14 de triulas de su 2022
Màuru Mura
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”
Foto: https://it.wikipedia.org/wiki/Eugenio_Scalfari
