Bocias, massimamenti, de chini ddis est a su costau, comenti su pobiddu, su sposu o su sposu e pobiddu becius chi non si ndi faint un’arregioni. Est calencuna de is informatzionis difundias de s’Istat chi at amostau is numurus de is feminas bocias in su 2021, e oi, in totu su mundu, est sa dì contras sa violentzia in pissu de is feminas.

Unu fatu chi non risparmiat sa Sardigna finas chi no est tra is primas regionis in Italia comenti bocidorgius: in conca agataus sa Liguria, S’Emilia Romagna, is provincias de Bolzano e Trento, e a s’aciungiri finas su Latzio e s’Abrutzo.

In s’Isula s’urtimu casu est cussu de Cabuterra aunia Slobodanka Metusev, de corantot’annus est morta a pustis chi su cumpangiu, Stevan Sajn de cincuant’annus, dd’at stochinada po dixiotu bortas. Is dus funt ospitis agradessius de una domu de acoglientzia. E propriu oi in Cabuderra ddu at essi una marcia chi partit de prassa Municipio e erribat in prassa Loiri.

In is urtimus cinc’annus is feminas bocias funt stetias dixiotu, tres in su 2022: su 5 de friargiu in Tzeddiani Daniela Careddu; su 30 de martzu in Porto Torres Liliana Caterina Mancusa e  su ses de Sant’Andria Slobokanka Metusev. Po unu tertzu est genti strangia, e is assassinus po treixi bortas funt stetius cumpangius o cumpangius becius, in atrus cincu, invecias, parentis de is bocias.

Prus o mancu su coranta po centu funt sussedius in is Cumunus de sa Citadi Metropolitana de Casteddu: seti is bocias. In segus ses in Tatari, duas in Aristanis, duas in su Sud Sardigna e una in Nugoro.

De cantu si ligit in sa relata de s’Istat, in is primus tres mesis de su 2022 funt lompias 194 lamadas a su numuru contras sa violentzia e su stalking, su 1522, 128 de Casteddu, 8 de Carbonia-Iglesias, 4 de su Campidanu de mesu, 6 de Aristanis, 16 de Nugoro, mancuna de s’Ogliastra, 24 de Tatari e 8 de Terranoa-Tempio.

 

 

Màuru Mura

 

 

Cenarba, su 25 de Sant’Andria de su 2022

 

 

 

Foto: https://comune.oleggio.no.it/notizie/306950/25-novembre-giornata-internazionale-contro