“Unu campu progressista chi non si pongiat a certai e chi a is ogus de sa genti s’amostit totu in paris est sa sola cosa chi si possat pensai invecias de sa drestra”. Ddu narat, in dd’una intervista a su giornali Repubblica sa presidenti de sa Regioni Sardigna Alissandra Todde, chi narat sa sua po su disacatu a intru de su campu largu, chi dd’at fatu binciri sa torrada eletorali in su mesi de friargiu passau, a pustis s’imbucamentu de Italia Viva in sa coalitzioni. Mateu Renzi “in Genova est paris po guvernai cun Bucci, in Basilicata cun Bardi, in su Parlamentu est passau de una parti a s’atra e non si cumprendit, innoi in Sardigna fut foras de sa coalitzioni nosta – aciungit sa guvernadora de sa Sardigna. Conte non certat de seguru cun Renzi, ma ponit a s’atentzioni manna una chistioni de coerentzia: non si podit pigai in giru sa genti”.
Is Steddaus funt connoscendu unu tempus nou: “Deus oi cuntenta meda de sa comunidadi politiga mia. Su Movimentu de is cincu Steddas est de chini ccu bivit e de chini s’iscrit, no est unu partidu cun su meri – sighit a nai sa Presidenti Todde –. No est de unu capu o de unu chi garantit, no est de chini po annus ddu at spremiu po, in segus, ddu ponni a un’ala candu ddi serbiat. Torrendu gratzias a Giusepu Conte oi seus una fortza politiga forti meda, frima in is idealis progressistas”.
Sa Todde est contras de su mudamentu de s’autonomia poita “aici s’Italia est prus debili, est unu disacatu po sa Sardigna poita ponit in chistioni una Regioni autonoma e speciali. Cicat de fairi citiri is regionis prus poboras ponendu in perigulu s’unidadi natzionali, cicat de nosi ponni is unus contras de is atrus. E Calderoli est a faci manna candu narat ca at essi unu referendum chi at a dividiri s’Italia”.
Sa Sardigna at pigau in manus sa lei, ma immoi Zaia est a morrungius. “Zaia no at cumprendiu is arregionis de is morrungius nostus, chi ant a fairi su caminu chi depint. Eus a sighiri a gherrai contras su cumpartzimentu de is erricus”.
Màuru Mura
Sabudu su trintunu de austu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.ansa.it/sardegna/notizie/2024/07/10/zaia-contro-todde-ha-posizione-politica-sganciata-da-realta_c941436a-4599-418f-ba97-21a76b1378e0.html
