“Funt is dis chi contant de prus po is eletzionis de dominigu chi benit in Sardigna, poita sa cuntierra po is collegius uninominalis si giogat po votus pagus”. Aici, de Cuartu, at nau su ministru de sa Cultura Dariu Franceschini.
“In s’Isula – at sighiu a nai su ministru – su Partidu Democratigu est fendu una bataglia forti po cussu chi pertocat s’insularidadi. Nosu seus segurus chi si depat ponni prus dinari po sa cultura e po su turismu, non feti po s’istadi, ca benit genti meda po su mari galanu chi ci teneis, ma finas po is atras cosas chi contant comenti is bellesas istoricas, archeologicas e artisticas, in manera chi si possat allonghiai sa stagioni turistica po totu s’annu. Is numurus narant ca est giai pesendusindi una cosa gai: in custu cabidanni parit de tenni numurus chi assimbigliant a cussus de su mesi de austu”.
De s’atra ala, invecias, Mateu Salvini si dda pigat contras de Màriu Draghi. In medas ant intendiu, ligendu intru de mesu is fueddus, su nomini de su segretariu de sa Lega, candu, chistionendu cun is giornalistas, su presidenti de su Consigliu at fueddau a innantis de chini ndi bolit tirai is santzionis e chistionat a sa cua dogna dì cun is russus” e in segus de “is nemigus, cun is mustaionis chi benint pagaus”.
No est addurada a lompiri s’arrespusta de su ministru beciu, chi in Pontida, sabudu passau at chistionau a sa genti de sa Lega: “Non tengiu tempus de sighiri is atobius de Draghi e sonumancu non c’est ancora un’obrigu de ddu fairi. Mi iat pragiri de prus chi Draghi invecias de chistionai de mustaionis, iat tenni su tempus de agatai su dinari po agiudai is italianus a pagai is bulletas, poita no isciu chi apat cumprendiu chi su perigulu prus mannu po su benidori est propriu custu”.
Chi Salvini sighit a tenni dudas po is santzionis a sa Russia, Giorgia Meloni est una de is prus chi ddas difendit: “Funt is mesuras chi serbint de prus”.
Màuru Mura
Giobia, su 22 de cabidanni de su 2022
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22
Foto: https://www.comune.nocera-inferiore.sa.it/In-Evidenza/novusact/viewarticle/articleid/4835
