“Teniaus in buca giai su gustu durci de sa vitoria chi iat airi bofiu nai de s’agatai a feti tres puntus de su terzu postu. Podiat essiri cussa scintidda chi andaus cichendu de partida in partida e nosi at airi agiudau a preparai sa partida de sabudu chi benit cun positividadi. Custu mi fait cumprendiri, a dogna manera, ca bastat pagu e custu pagu ddu depeus cicai in dogna partida, cun sa spera manna chi sabudu diventit s’ocasioni giusta”.

Custus is fueddus de “mister” Liverani, a pustis su paregiu po 2-2 de su Casteddu in domu de su Frosinone, sa prima in classifica de su campionau de serie B, cun Pavoletti chi s’est bidu annullai su gol de su 3-2 a su minutu 98 de sa cuntierra, po unu fuorigioco de pagu-pagu.

“Seus partius  beni – at sighiu a nai s’allenadori casteddaiu – cun cuatro piciocus giovunus meda. Eus segnau e, in segus, nd’eus fatu fairi unu a is atrus chi si podiat evitai, chi nos at fatu perdiri s’allirghia. S’atru gol de su Frosinone est stetiu bellu meda, ma no eus mai lassau perdiri e custu mi fait cumprendiri ca sa scuadra tenit gana de gherai po s’obietivu chi teneus totus in conca. Tra nosu e su Frosinone est diversa meda sa manera de calai in campu, ma nosu a pustis sa partida deoi depeus tenni fidi in cussu chi scieus fairi e in sa possibilidadi de migliorai ancora de prus”.

Liverani at chistionau finas de Kourfalidis: “Tenit fortza e fisicidadi, podit giogai in dogna logu de mesu campu. Tenit totu po custa categoria e chi ddu apu post ude su cumentzu est feti poita si ddu minesciaiat e chi sighit aici in su benidori su campu ddu at a biri meda. Perou finas chini partit setziu in panchina scit ca podit e depit lassai unu signali, Depeus essiri prus malus in denanti e cicai de poderai sa bocia cantu prus. S’obietivu est cussu de lompiri a su 26 de su mesi ch’intrat cichendu de fairi prus puntus possibilis”.

 

 

 

Màuru Mura

 

 

 

Lunis, su 28 de Sant’Andria de su 2022

 

 

 

Foto: https://www.spaziocalcio.it/calcio-italiano/serie-a/liverani-destinato-esonero-parma-torna-d-aversa-allenatore/