Su Napoli sunfrit, gherrat e a s’acabbu festat: a sa fini de una filera de tirus de is undixi metrus, acabbada po dexi a noi, is partenopeus si pigant sa cualificatzioni po is cuartus de finali de Coppa Italia. Su Casteddu fait sa figura sua in dd’una partida giogada cun gana, barra e s’est arrendiu feti cun is tirus de is undixi metrus.
Sa scuadra de domu partit a forti de averas e in sa parti de unu de sa partida giogat cun conca e cursa. Su campu pariat totu de is napoletanus. Su gol de su Napoli de Conte lompit a su minutu de bintotu: Lucca cun dd’unu corpu de conca sfrutat beni meda unu cross de Vergara e mandat sa bocia a is palas de Caprile. S’1-0 de is asulus, campionis de s’Italia ocannu passau, parit chi siat cosa minescia, ca finas a tandu funt is meris de su campu. Est finas a nai ca su Casteddu in sa parti de unu non ce dda fait po nudda a ponni in pensada su portieri “nemigu” Milinkovic-Savic, chi pariat po s’ora unu chi fut castiendu sa partida chena airi pagzau su biglietu.
In sa parti de duas su Casteddu, torrendu gratzias a s’imbucada de Pitanu Esposito, si dda giogat meglius meda e difatis su matessi Esposito torrat a ponni sa partida in ecuilibriu. Est finas de nai ca su Napoli erriscat de torrai a giumpai su Casteddu cun dd’unu tiru spantosu de McTominay, ma chena arrennesciri a serrai sa partida a intru de is noranta minutus.
Si lompit, aici, a is tirus de is undixi metrus, aunia s’arriolu bessit a sus a dogna tiru. Sa filera est longa-longa, finas a candu su Casteddu faddit e su Napoli, cun Buongiorno, segnat e si pigat is cuartus de finali aunia, su cuatru de friargiu de ocannu chi benit, at atobiai s’Inter chi eris c’at stupau su Venetzia de Stroppa, bincendu po 5-1.
Immoi, faddia sa coppa Italia, conca a sa partida de campionau cun sa Roma, dominigu a is tres de a pustis prangiu in sa Domus Arena.
Màuru Mura
