Giorgia Meloni in Montecitorio po presentai a sa Camera totu cussu chi disigliat de fairi in custus cinc’annus. Po issa est sa prima prova parlamentari, fintzas chi podit contai de una magiorantzia forti.

“Est un’ora de fundamentu in sa democratzia nosta e non si depeus atacai – at cumentzau a nai –. Torru gratzias a chini at a bolli chistionai, cale chi siat scioberu facat. Finztas chi su torrai gratzias miu, su prus intendiu, andat a su populu italianu, a chini at decidiu de non bolliri mancai in cabina eletorali e at donau su votu  a nosu, in cussu processu democratigu chi bolit in su populu e feti in su populu sa sovranidadi”.

“Intru de is responsabilidadis chi oi m’intendu in is palas, at sighiu a nai a pustis airi torrau gratzias a Mariu Draghi e a su presidenti de sa Republica Sergiu Mattarella, c’est cussu de essiri sa prima femina capu de su Guvernu de custa Natzioni. Candu mi frimmu in custa chistioni intendu totu is responsabilidadis de totu cussas feminas chi tenint problemas po fairi biri cantu balint”. Duncas at arregodau fintzas cussas feminas chi “ant fraigau cussa scala chi oi nosi permitit de tenni custa nova. Tra is feminas cicadas finas Gratzia Deledda, cicada feti po nomini paris a atras comenti Nilde Jotti, Tina Anselmi, Oriana Fallacci e Samantha Cristoforetti.

Sa genti at scioberau su centrudrestra “e nosu eus a mantenni is impignus nostus. Sciu beni chi a calencunu, osservadoris e cussus chi funt in s’opositzioni, non ant andai beni su programa nostu, ma non perdu tempus po nai ca sa democratzia est prus po calencun chi non po calencun’atru”.

Po cantu pertocat sa politiga internatzonali tenit is pensamentus crarus: “S’Italia fait parti de s’Ocidenti e de is alleantzias ocidentalis, est in sa Ue, in sa Nato, fait parti de su G7 e bartzolu, paris a sa Grecia, de sa civiltadi ocidentali e de is valoris de libertadi, oguagliantzia e democratzia”.

 

 

 

Màuru Mura

 

 

 

Martis, su 25 de santu Gaine de su 2022

 

 

 

Foto: https://www.dire.it/25-10-2022/817395-oggi-e-il-giorno-della-fiducia-alle-11-il-discorso-di-giorgia-meloni/