“Ddu scieus beni, connoscieus comenti seus in sa classifica e cumprendeus ca no est galanu mea. Ndi fueddaus intru de nosu e scieus ca depeus trabagliai in campu po nosi sarvai de sa serie B. Chi ddue calas est tostau a torrai a bessiri, po custu est de importu abarrai in serie A. Est de importu massimamenti po totu sa Sardigna, non feti po nosu o po sa citadi de Casteddu. Custu est cussu chi nosi scambiaus in dogna allenamentu deu e is piciocus”. Non s’atacat, comenti est costumini, Claudiu Ranieri e fueddat cun su coru in manus a s’acabbada de s’atobiu cun is giornalistas a innantis de sa partida contras de sa Latzio de cras, a is tre de a pustis prangiu in sa Unipol Domus. Partida de importu mannu, poita su Csteddu at perdiu is urtimas tres partidas (3-1 cun su Frosinone, 1-2 cun su Torinu e 4-0 cun sa Roma)

Is atras scuadras, in gherra po non ci calai in serie B, no est chi funt postas meglius, ma su Casteddu depit curriri po sei chena pensai a is atrus. Est partida dificili cussa de cras, ma fina scussa cun su Bologna fut de aici. E a cussa partida tocat a si castiai po tenni fidi e spera.

“Est doveri miu agatai degi giogadoris chi dongiant totu in campu”, sighit Ranieri, acrarendu ca sa Latzio est una de is scuadras meglius, ma non po custu tocat a calai in campu giai disisperaus. “Tocat a torrai a fairi puntus, ca chi nde chi no is atras trumas erriscant de si fuiri”.

“At a serbiri una partida bona, po cicai de non perdiri. E chi sa fortuna, una bia dogna tanti, nosi agiudat dda podeus finas binciri, ma s’importu mannu est cussa de non dda perdiri. Agataus una scuadra forti de averas chi ocannu passau est lompia feti a palas de su Napoli. Depeus giogai cun umiltadi, ma finas cun barra e gana de morri in campu a pustis dogna atzioni. Chi pensaus de nosi dda giogai feti cun sa tecnica dda perdeus, ma deu pensu ca chi umperaus is armas nostas ddus podeus frimai. Giai in sa partida cun issus in Roma ndi fustis bessius beni, finas chi iaus perdiu”.

 

 

 

Màuru Mura

 

 

Cenarba, su noi de friargiu de su 2024

 

 

Attività realizzata col contributo della Regione Sardegna – Imprentas 2023-2024.

Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://www.dazn.com/it-IT/home/9rp7obltzvzt7wwd4lg9ui3v8