S’aspetat po oi sa sententzia po su processu in pissu de sa chistioni Open Arms. Custu mengianu is giuigis de Palermo s’ant a agatai in s’sposentu de consigliu. Sa Procura at pediu sa cundenna po ses annus de presoni po su ministru. Sa difesa, mancu a ddu nai, a pediu, invecias, s’assolutzioni.
Su capu de sa Lega, Mateu Salvini, est incurpau de secuestru de personi e de no airi amostau is atus de uficiu po no airi fatu lompiri in is costas italianas is migrantis de sa navi de sa Ong Spagnola. Candu totu est sussediu, in su mesi de austu de su 2019, Salvini fut ministru de is Internus de su guvernu ghiau de Giusepu Conte.
“Chi is giuigis ant a nai ca non tengiu curpas ap’essi cuntentu e allirgu po is figlius mius e poita apu fatu beni su trabbagliu miu. Chi ant a nai, invecias, ca tengiu curpas ap’essi cuntentu e allirgu su matessi poita ca non tengiu nudda de mi fairi perdonai: apu difendiu sa Natzioni mia de migrantis chi non podiant imbucai e de traficantis de personis”, at nau Salvini. “Chi non mi cundennat apu fatu su doveri miu e adiosu a sa manca. Chi mi cundennant eus apediri un’atru processu e ia nai ca est unu disacatu non po mimi ma po s’Italia”, at sighiu a nai su ministru.
“Non si podit nai ca si funt difendias is lacanas chena tenni contu de 147 ominis e feminas in mesu a su mari”, iat nau su procuradori Sabella, aciungendu: “Custu no est unu processu politigu, calencunu at fatu unu sceberu personali chi giumpaiat sa linia de su guvernu ca fut cussa de cumpartziri is migrantis. A innantis si faint calai de sa navi e dapoi si cumpartzint ca chi nde chi no si fait politiga in pissu de is suferentzias de is atrus. Sa personi in mesu de su mari est de sarvai, chinechisiat”.
Salvini, lompiu eriseru in Palermo, at incasciau sa solideriedadi de totu is amigus de de s’orrestu de s’Europa e de Elon Musk: “Orroba de macus: Salvini est processau po airi difendiu s’Italia”.
Màuru Mura
Cenarba, su binti de mesi de Idas de su 2024
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.ilfattoquotidiano.it/in-edicola/articoli/2024/12/20/open-arms-il-giorno-della-sentenza-salvini-aspetta-il-suo-regalo/7811335/
