Su 21 de gennargiu de su 1921, duncas centu e un’annu a oi, nasciat in Livorno su Partidu Comunista Italianu chi est stetiu su partidu comunista prus mannu de s’Europa ocidentali. Su primu nomini chi ddi ant donau fut cussu de Partidu Comunista d’Italia e at bidu sa lugi de genti che Nigola Bombacci, Amadeu Bordiga, Onoratu Damen, Brunu Fortichiari, Antoni Gramsci e Umbertu Terracini, a pustis chi ndi funt bessius, cun su XVII Congressu, de su Partidu Socialista italianu. At poderau su nomini de nascioni finas a su mesi de làmpadas de su 1943 e in segus est cambiau in Partito Comunista Italianu.

At sunfriu meda in su tempus de su fascismu e ominis medas chi creiant in custas ideas ant donau sa vida po s’Italia libera e democratica, massimamenti unu de is pensadoris prus mannus chi su mundu at tentu: su sardu Antoni Gramsci.

Atru sardu chi at fatu sa storia de custu partidu, chi at fatu sonniai giovunus, ominis e feminas de tempus diversus, est stetiu Erricu Berlinguer, segretariu de su 1972 finas a sa morti in su mesi de làmpadas de su 1984. Atru segretariu connotu fut Palmiro Togliatti chi ddu at fatu po prus de bint’annus.

In su 1976 at tentu su massimu de is votus e ateretantu est sussediu candu est mortu Berlinguer in is eletzionis europeas, aunia su PCI iat pigau prus votus de totu is atrus partidus.

Sa storia famada de su partidu est acabada in su 1991 candu s’urtimu segretariu, Achille Occhetto, ddu at fatu morri po donai vida a su Partidu Democratigu de sa sinistra. Una parti prus pitica de cussa chi fut in su PCI non fut de acordiu cun Occhetto e po custu at fatu nasciri in su matessi annu su Partidu de Rifondatzione Comunista.

Atrus segretarius funt stetius Luisu Longo de su 1964 a su 1972 e Alisandru Natta de su 1984 a su 1988. S’unu e s’atru ant fatu fintzas su Presidenti de su partidu, su primu de su 1972 a su 1980 e su segundu de su 1989 a su 1990.

 

21 de gennargiu de su 2022

 

 

Màuru Mura

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

 

Foto: https://www.aclimilano.it/un-secolo-fa-nasceva-il-pci/