Depiat acabai su 31 de custu mesi s’emergentzia po sa pesta de su Coronavirus, invecias su Guvernu, ghiau de Màriu Draghi, at decidiu de dda allonghiai finas a su 31 de martzu de ocannu chi benit: a dogna manera no est obrigu de umperai sa mascherina in is logus obertus. Nova bona, po nosu, est ca, invecias, de imoi est obrigu a si vacinai po chini bestit una divisa, po totu cussus chi trabagliant in sa scola e po chini trabagliat in su mundu de sa sanidadi, foras de dotoris e infermieris chi depint fairi su “booster”. Is sardus chi preferint rinuntziai a su trabagliu e a su dinari, invecias de fairi su vacinu, funt, prus o mancu in duamila. In sa scola, finas a imoi chini no at fatu su vacinu est intrau in is aposentus a pustis su tamponi, duncas numurus uficialis non di teneus, ma sa percentuali de is vacinaus intru de is professoris e su personali Ata est a ingiriu de su 95%. Funt paghissimus cussus chi non si vacinant po una chistioni de principiu.
In sa dì de eriseru su ministeru de s’Istrutzioni at mandau unu paperi a totu is scolas po fairi sciri comenti si depit fairi intrai sa genti in sa scola, po agiudai is dirigentis. Su mecaniscu nou at amostai finas su mudamentu de sa vacinatzioni. Intru de chini bestit una divisa (politziotus, carabineris, finantzieris e militaris) is vacinaus funt prus o mancu su 90% e in Sardigna chi no ant fatu su vacinu depint essiri cuasi 800.
In su mentris in s’Isula sarda funt 162 is impestaus nous e, a dolumannu, tocat a contai unu mortu. Bonas novas erribant de is spidalis: sa genti chi s’agatat in sa terapia intensiva est in numuru de 6, unu de mancu de sa dì a innanti, e abasciaus de cincu finas cussus chi s’agatant in is atrus aposentus: imoi funt 88. Incungiaus in domu, po s’ora, funt 3.290.
Su mortu est un’omini de 73 annus chi biviat in sa provincia de su Sud Sardigna.
Màuru Mura
Foto: https://siulp.it/obbligo-vaccinale-7-dicembre-2021-esito-incontro-con-prefetto-giannini/
