S’agatat in is ediculas de totu sa Sardigna, e chini no ddu agatat ddu podit pediri a nosu, su numuru centu de sa rivista nosta. Unu numuru spantosu, comenti depiat essiri e comenti eus cicau de fairi. Funt in medas is amigas e is amigus chi nos ant donau una manu po ddu fairi nasciri: Pepe Corongiu, lacunesu, Anna Cristina Serra, de Santu Asili de Monti, Antoni Natziu Garau, de Biddabirdi, Banne Sio, orgolesu, Maria Teresa Rosu, de Orosei ma lulesa de annus meda, Pieru Luisu La Croce, tonaresu, Bolentina Pulina, piaghesa ma cuartesa de annus meda, Tonino Oppes, de Putumajore, Robertu Mura, sadilesu, Vitoria Campus, de Codrongianus, Luciana Lapia Piredda, nugoresa, Erricu Cambedda, teuladinu, Antoni Caria, de Bonnanaro, Cintziedda Tuveri de Lunamatrona, ant obertu sa memoria insoru po arremonai comenti funt lompius de nosu. Ddu ant fatu cun su coru in manus e cussu chi nd’est bessiu a campu est ca in Làcanas funt imbucaus in d’una familia.
De sempiri nos ant agiudau e agataus spantosu chi siant ancora innoi a cumbatiri una cuntierra chi non scies de binciri: cussa de s’umperu de sa limba sarda in totue e po cale chi siat chistioni.
Lucia Cossu, pitzinna de Putumajore at intervistau a su diretori de Làcanas, si depiat fairi, ddu fiant totus, finas po fairi cumprenidiri a is ligidoris comenti nascit Làcanas e comenti sighit a biviri, massimamenti in custu tempus feu po sa curtura e po is libburus.
Su numuru s’oberit cun s’intervista a su diretori, eus nau, e sighit cun d’una intervista, torrada a pigai de su numuru 1 de Làcanas, de Pàulu Pillonca a un’omine de gabbale: Bachis Bandinu! Spantu mannu is fueddus de Bandinu, chi bint’annus a oi naraiat giai cosas chi balint fintzas immoi.
A sighiri is arregodus de totu cussus chi eus arremonau: unu prus galanu de s’atru, chena distinzioni peruna. Gratzias de coru piciocas e piciocus!
Su numuru centu, a pustis de is arregodus, sighit cun articulus de Maria Antonieta Piga, Laura Medda, Pieru Luisu La Croce e Vitoria Campus.
S’agatant, comenti in dogna numuru, is rubricas chi funt sempiri in Làcanas: sa poesia a taulinu, su intzerta de Giuannibachis Serra, de Santulussurgiu, is Fabulas de su nurresu Giuannicarrulu Secci, Subra su palcu, cun d’una gara intru de Masaleddu e Mura in Ortueri, Ervas de Lapia Piredda, sa Coghina cun sa ghilartzesa Antonedda Fadda e is libburus de Domus de Janas presentaus de Manola Bachis.
Nosu torraus gratzias a totu cussa genti chi sighit is bessidas de Làcanas, seis bosatrus chi nosi donais sa fortza e finas sa spera po unu mundu meglius.
Ma is gratzias prus mannas andant a chini nd’at pesau sa rivista e nos at imparau de trabagliai cun onestadi…
Màuru Mura
Mercuris, su binticincu de gennargiu de su 2023
Foto: Archivio Domus de Janas
