Est erribada s’uficialidadi: Fabiu Liverani est s’allenadori nou de su Casteddu.

Sa nova dd’ant donada, de sa sociedadi e totu: “Su Casteddu Calcio faiti sciri de airi agatau s’acordiu cun Fabiu Liverani chi de su primu de su mesi de orgiolas de ocannu at essi s’allenadori de sa scuadra po cicai de dda torrai a portai in Serie A. Cumentzat de immoi un’atru contu: bonu trabagliu Mister”.

S’acordiu est po un’annu feti, ma chi Liverani ce dda fait a portai inderetura su Casteddu in Serie A balit po un’atr’annu puru.

Eriseru s’allenadori beciu de Genoa, Lecce e Parma est erribau in Sardigna po rendiri bisita a Asseminello: “Sensatzionis galanas, c’at meda caminu de fairi, ma mi parit ca ci siant bideas bonas”, is primus fueddus chi at nau.

Nasciu in Roma su 29 de arbilli de su 1976, Liverani at giogau in sa Primavera de su Casteddu, a innantis de una carriera chi ddu at bistu giogai po cuatruxentu bortas intru de Serie A, 288, e Serie B.

At cumentzau su trabagliu de allenadori cun is piciocus de su Genoa e de s’istadi de su 2013 at sighiu sa scuadra de is mannus. A pustis chi Preziosi, chi cambiaiat allenadori comenti si cambiaiat su bestiri, si trasferidi in Inghilterra a s u Leyton Orient po poi torrai, in su mesi de martzu de su 2017 in Italia: in serie B portat sa Ternana de s’urtimu postu a si sarvai de sa Serie C.

Torrat a partiri de s’annu in segus de Lecce e in Puglia, in dus annus partit de sa Serie C lompendu a sa Serie A. Custu ddi balit sa Panchina de prata, comenti allenadori pru bravu de sa Serie B po s’annu 2018-19. In A sempiri cun su Lecce po pagu non ce dda fait a ddus sarvai. S’annu infatu si setzit in sa panchina de su Parma ma sa bonasorti non si ddue acostiat.

Immoi torrat a partiri de Casteddu: bonu trabagliu, Fàbiu, arregoda ca tenis totu un’isola in is palas.

 

 

9 de làmpadas de su 2022

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

 

 

Foto: https://www.gazzetta.it/Calcio/Serie-B/02-04-2019/serie-b-lecce-liverani-gioco-punti-vittorie-panchina-nessuno-come-lui-330409037248.shtml