Torrant a morrungiai is pastoris sardus chi s’agatant, cuasi comenti de sempri, in crisi niedda. Si funt atobiaus in su caminu chi de Bitti portat a Sologo e de innoi ant moviu in dirretzioni de sa Statali 131 Dcn cun tratoris e atras machinas.

Sa truma at cicau de fairi andai prus a bellu su traficu po cicai de ndi scidai sa Regioni e su Guvernu centrali de Roma. Scritas in lentzorus e in cartellus: “Assessora Murgia baidindi non as galu studiau”, “Nosi boleis sciaus, eis at tenni genti de rebellia”, si ligiat intru de medas.

Funt torraus a manifestai, a pustis de is morrungius spantosus de su 2019 po pretziu de su lati. Ma oi non dda teniant cun is industrialis. “Su lati imoi nosi ddu pagant a un’euru a litru e non a sessanta centesimus comenti in su 2019, ma seus prus meda mali pigaus de tandu – narant de sa manifestada –. Su pretziu de s’energia e de su gasoliu est cuasi duas bortas de tandu. Su mangimi costat su 20% in prus. Pedeus chi totu is politigus de su Consigliu regionali torrint a domu insoru, poita non funt fendu nudda po cicai de non fairi serrai is siendas nostas. Seus sa prima industria de sa Sardigna e eus a gherrai po non serrai totu. Non podeus fairi atru!”.

“Seus morendunosì e nemus si nd’acatat – un’atra bogi de sa manifestada -. Teneus erbeis, procus e bacas e lompeus de un’annu de disisperu. Ci a innantis paghiaus una fatura de mangimi unu tanti imoi dda pagaus a su 50% in prus. Non fait a chistionai nemancu de su gasoliu e de sa currenti. Nosi ant lassaus a sa sola, in atongiu non funt erribaus is premius de sa comunidadi europera e in Argea no arrespundit nemus. Comenti fait a biri unu benidori bonu chini tenit una familia cun figlius? Is poilitigus regionalis chi non funt capassus de guvernai torrint a fairi cussu chi faiant prima”.

Iat essi finas de ora a donai una manu de agiudu a totu custa genti. Ma sa politiga est citia…

 

 

15 de friargiu de su 2022

 

Màuru Mura

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

Foto: Archivio Domus de Janas