In su spidali Santu Martine de Aristani in tres dis funt mortus cuatru personas impestadas de su Covid. Furint in su Pronto Soccorso de su spidali e aspetaiant unu postu in calencuna de is terapias intensivas sardas. Sa situatzioni de dificili est diventada sempiri peus finas chi dotoris e infermieris funt fendu prus de cussu chi depint fairi. De dominigu est obertu, un’atera borta, s’aposentu Covid de su spidali de Bilartzi. Cun sa pesada de sa varianti Omicron e s’artziamentu mannu de is impestaus in su Pronto Soccorso, finas chi su spidali Santu Martine no est prus “Spidali Covid”, funt torrendu a intrai ominis e feminas impestaus.

“Sa situatzioni est dificili meda – faint sciri de su spidali – ma seus fendu de totu po cicai de curai a totus. Dominigu teniaus trexi impestaus oi funt torraus a sa metadi”.

Tres de custus funt partius po Bilartzi e atrus tres funt mortus. “Po is mortus non eus possiu fairi nudda, ca sunfriant giai de atra cosa, eus fatu su possibili e de prus purru. Su problema mannu est ca totu is spidalis funt sunfrendu e pagu podint fairi”, sighint a nai de su Santu Martine.

Po s’ora funt seti cussus chi s’agatant in su Pronto Soccorso aspetendu de intrai, calencunu de custus est postu mali e iat a tenni abbisongiu de pigai aria prus de totu.

Chi Aristanis prangit Carbonia e Igresias no errint. In su Sirai e in su Cto su Pronto Soccorso est frimu de sa genti meda chi erribat e si funt intregaus una pariga de aposentus feti po is impestaus de su Covid.

In is dus spidalis sulcitanus funt undixi is impestaus (otu in Carbonia e tres in Igresias), totu chena vacinu.

In su fratempus in Sardigna funt 1.007 is impestaus nous in pissu de 7.765 cumpudus.

Abarrat oguali su numuru de chini est in terapia intensiva, bintotu, e dus funt in prus cussus chi s’agatant in is atrus aposentus, 238. Funt incungiaus in domu in 21.197 e a dolumannu funt mortus in ses: tres ominis de 54, 67 e 93 annus in sa provincia de su Sud Sardigna, un’omini de 78 annus in sa provincia de Aristanis e dus ominis de 82 e 95 annus in sa provincia de Tatari.

 

 

18 de gennargiu de su 2022

 

 

Màuru Mura

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

Foto: https://www.linkoristano.it/2020/10/16/allospedale-san-martino-oristano-aprira-un-reparto-malati-covid-19/