“Draghi a medas non pragit e medas e totu non ddu iant votai po pigai su postu de Mattarella poita iat bolli nai de andai a torrai a votai po su Guvernu inderetura.

Funt is fueddus chi iat airi nau Sirviu Berlusconi a chini ddi est a su costau, chistionendu de is votatzionis chi cumentzant su 24 de gennargiu po nu presidenti de sa Repubrica nou.

“Forza Italia – iat airi nau galu Berlusconi – non si intendit obrigada a sustenni su guvernu chena Draghi e, chi sussedit, bessit de sa magiorantzia”.

Fueddus chi ant fatu arrespundiri is atrus politigus: “Pensu chi Berlusconi – at nau su segretariu de su Partidu Democratigu Erricu Letta – at a nai, intru de pagu, ca cussus fueddus nono funt cosa sua. Chi, invecias, a nau aberu custu po mei funt fueddus grais, ma soi seguru chi su capu de Forza Italia at a nai ca non funt cosa sua. Est faddia s’ora de nai umperai custus fueddus”.

Totu su centrudresta fait su nomini de Berlusconi comenti Presidenti de sa Repubrica, ma de custa pensada Letta narat ca: “Berlusconi est unu capu de partidu, duncas su nomini dividit sa genti, e su matessi est po mei, Salvini, Meloni o Conte. Unu capu partidu dividit, est aici de sempiri”.

Mancant duas cidas po cumentzai a votai su Presidenti nou e, po imoi, totus timint a fairi calencunu nomini. Sa partida est dificili, ma non at essi longa meda. Mattarella non bolit sighiri, si fait su nomini de Mariu Draghi e sa volontadi de Berlusconi de si giogai is cartas suas. Est propiu de custu chi tocat a partiri po provai a cumprendiri eita est sussedendu in custas dis. Su Cavalieri est ponendu importu mannu in tres campus: cunvinciri is amigus Meloni e Salvini ca su nomini su est su solu chi si possat fairi, fairi cumprendiri a Draghi ca feti aici podit sighiri a si poderai sa cadira de presidenti de su Consigliu e cicai de non fairi erribai a un’acordiu Meloni e Salvini cun su PD po unu nomini chi andat beni a totus.

Eus benni a biri, sa partida est cumentzendu.

 

 

14 de gennargiu de su 2022

 

 

Màuru Mura

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

Foto: https://it.wikipedia.org/wiki/Palazzo_del_Quirinale