Funt medas is biddas galanas in Sardigna. Ddas teneus in is  intragnas e cicaus, in donnia, de chistionai feti de is cosas bellas chi arregalant. Seui, po nosu, est sa bidda de su coru, de seguru poita nos at pesau candu fustis pipius e piciocheddus. Totu is arregodus partint de su Stradoni, de Peis de Idda, de Cabissa de Idda e de Costigedda.

Po chini est atesu de sa bidda, ca Seui tenit unu muntoni de disterraus in s’orrestu de Sardigna e in totu su mundu, bastat a serrai is ogus po s’agatai in cussas orrugas prenas de strintorgius, in cussas bessidas e caladas spantosas po is strangius, in cussus padentis prenus de iligis, orrolis e castangias. Famaus, in atrus tempus, funt is ferreris, is maistus de linna, is baristas e is butegheris. Non connoscit preissa, su seuesu, est apricau e gherrat cun gana e barra po cicai de arregalai unu benidori sempiri meglius a is figlius.

At sunfriu Seui, cun su disterru de is figlius sus, cun is mortus in guerra e cussus de sa miniera de Fundu de Corongiu. De dus annus a cust’ala at connotu atra suferentzia: pariat ca sa pesta de su Covid fut atesu e mai iat essi lompia in cussus caminus totorgiaus.

A dolu mannu, invecias, ddu est erribada e nd’at liau tres figlius in d’unu annu e mesu: Carloteddu pariat prenu de saludi, e, a pustis una vida de disterrau, est mortu in su mesi de cabudanni de su 2020; Sandro, omini bonu e cun contus de fairi apilurtzai, ddu at sighiu in su mesi de Idas de su matessi 2020 e, nova mala e frisca, eriseru Lucianu, atru omini bonu, de sustantzia e babbu de familia, at lassau custu mundu.

In bidda a Lucianu ddu connosciant totus, e, a sa matessi manera, connosciant sa familia de genti onesta e trabagliadora chi ddu at pesau e, prus che a totu, connoscint sa familia noa chi at pesau: dus piciocus, Mattia e Riccardo chi funt duas prendas e una pobidda, Patritzia, chi ddu at acumpangiau in sa vida.

Imoi s’agatant a sa sola, cun su coru a orrogus e prenu de lambrigas, ma su disisperu insoru est finas de totu sa bidda, chi si torrat a frimai, comenti est sussediu paricias bortas. At a torrai a partiri Seui, est seguru, ma ddu at a fairi cun su coru ancora prus grai.

A bosatrus, Patritzia, Riccardo e Mattia, is passientzias prus mannas.

 

 

 

Màuru Mura

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

Foto: Archivio Domus de Janas