Kamala Harris e Tim Walz giumpant chena peruna duda, ma finas chena peruna meraviglia, sa prima fueddada a pustis essiri candidaus cun is democraticus. Miniscimentu, o curpa, finas de su chi at fatu is preguntas, sa giornalista de sa Cnn Dana Bash, chi est abarrada in is suas.
Sa sola noa est s’intentzioni de Kamala Harris de ponni un urepublicanu in s’aministratzioni sua, sempiri chi bincit sa torrada eletorali, comenti iat giai fatu Barack Obama ponendu a sa difesa su republicanu Robert Gates.
“Apu passau sa carriera mia cumbidendu totus a ascurtai chini non dda pensat ce mimi. Pensu chi siat de importu mannu a tenni a su costau genti chi tengiant opinionis e contus de vida diversas candu tocat a pigai decisionis de importu. E po custu penus chi iat essi cosa bona e giusta, po totu is americanus, a tenni calencunu republicanu in s’aministratzioni mia”, at nau sa candidada a sa presidentzia de is Stadus Unidus. Sa matessi Harris at a pustis nau ca calencuna cosa est mudada in is suas positzionis politigas, comenti ddi cuntestat Trump, ma ddas at spiegadas cun s’esperientzia de airi fatu sa numuru dus de Biden, ma at fatu cumprendiri ca “cussu chi po mei contat no est mudau”.
Est a nai, at nau in manera crara, issa at sempiri cretiu chi “sa crisi climatica est una chistioni urgenti”, arremonendu is leis e su dinari postu a curriri de s’aministratzioni Biden in custu disacatu. Ma at impromintiu ca de presidenti no at a negai su “fracking”, chi est sa manera de ndi bogai su gas e su petroliu de is orrocas, unu setori de importu de sa Pennsylvania, unu de is Stadus a metadi intru de issa e Trump. De arregodai ca candu fut cun Biden sa Harris fut contras de custa tecnica.
At, in segus, pigau s’impignu de fairi “rispetai is leis in sa genti chi passat, chena lei, is lacanas de is Stadus Unidus”, finas chi a innantis fut po non donai curpas.
Màuru Mura
Cenarba su trinta de austu de su 2024
Attività realizzata col contributo della Regione Sardegna – Imprentas 2023-2024. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.open.online/2024/08/30/usa-2024-intervista-kamala-harris-politica-armi-israele/
