Gustavo Petro est su primu presidenti de manca de sa Colombia. Su senadori, capu de s’allianzia Pacto Historico, at bintu contras s’indipendenti Rodolfo Hernandez. Petro at tentu 11.260.105 votus, seticentumila in prus de Hernandez, chi in percentuali funt su 50, 48% de su totali.

Una “dì de festa po sa genti – is primus fueddus de Petro –. Chi festat sa prima vitoria de su populu. Chi tanta suferentzia siant agiudadas de s’allirghia chi oi prenit su coru de totu is Colombianus. Custa vitoria et po Deus, po sa genti e sa storia sua. Oi est sa dì de is orrugas e de is prassas prenas”.

Is primus cumplimentus cun Petro e cun sa vicepresidenti Francia Marquez, chi est de generatzionis africana, est stetiu su presidenti chi at lassau s’incarrigu, Ivan Duque: “Apu tzerriau Gustavo Petro po ddi fairi is augurius comenti presidenti eligiu de sa genti. Eus decidiu de nos atobiai in is dis chi ant erribai po cumentzai una collaboratzioni comenti si depit: armoniosa, istitutzionali e a sa lugi de totus”.

Intrau de piciocu in sa guerriglia de su M-19 (cun s’annomingiu de Aureliano, po arregodai su protagonista de “Cent’anni di solitudine” de Gabriel Garcia Marquez) chena però mai intrai in atzionis militaris, Petro tenit in is palas bint’annus de atividadi politiga. Tenit sessantadus annus, e fut sa tertza borta chi si presentaiat po intrai in sa Domu Narino, a pustis airi perdiu in su 2010 cun Juan Manuel Santos, Premiu Nobel po airi firmau sa pagi cun is Farc e de fatu in su 2018 cun Duque etotu.

Ma est sa figura de sa vicepresidenti chi at spantau: bestiris africanus e punnigosu artzau. Sa Marquez at fatu una campagna eletorali po “cussus chi non tenint nudda, cussus chi no bint peruna umanidadi e non tenint perunu diritu”.

No est sa prima femina chi ce dd’acabbat a sa vicepresidenza, poita pigat su logu de Marta Lucia Ramirez, chi fut sa numuru dus de su guvernu apena bogau.

 

 

20 de làmpadas de su 2022

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

Foto: https://www.dire.it/20-06-2022/751093-gustavo-petro-nuovo-presidente-della-colombia/