Crescint de su 47,7% is impestaus de Covid de una cida in Sardigna. Est cussu chi benit a campu de is studius de sa Fundatzioni Gimbe po sa cida chi andat de su 5 a s’11 de gennargiu. In s’Isula in pissu de centumila personis funt 1.056 cussus impestaus.

Sa zona posta peus est cussa de sa provinca de Nugoro dun 1.081 impestaus. Sighit s’oristanesu cun 720 e duncas sa parti arta de Sardigna cun 536 e serrant sa Citadi metropolitana de Casteddu cun 397 e su Sud Sardigna cun 336.

Is terapias intensivas funt po su 13,7 intregadas a is malaidus de sa pesta e is atrus aposentus funt a su 13,5. Sa Sardigna, est a nai, paris a su Molise, est sa sola chi non giumpat su 15%.

Cun atrus trexi in terapia intensiva e atrus 265 in is atrus aposentus sa Sardigna ce dda iat acabai in zona colori de arangiu. Po intrai in zona orrubia, ca po medas categorias est s’inferru, serbint trintatres in sa terapia intensiva e cuatrucentubinticincu in is atrus aposentus.

Is vacinaus sardus, chi ant fatu su de tres puru, funt 1.281.665 e funt s’80,1% de totu sa genti chi bivit in s’Isula, arregodaus ca sa media de is atras regionis italianas est unu pagheddu prus bascia, su 79%. Andant contaus puru cussus chi ant erriciu feti sa vacinatzioni de unu: su 3,2%. Is pipius, de is cincu a is undixi annus, chi ant fatu totu is vacifunt 2.782 (su 2,7%) e cussus invecias chi funt frimus a se de unu funt 16.829.

In su fratempus sighit a s’artziai su numuru de is vacinaus, po mori de cust’atra varianti de sa pesta e po podiri tenni su green pass: si pesat sa percentuali de su vacinu de unu in cussus chi tenint prus de otant’annus (90,5%), in chini andat de is cincuanta a is cincuantanoi (86,2%), ma finas in cussus impissu de is corant’annus (82,3%), in pissu de is trinta (81,6%), a intru de si binti e bintinoi (86%) e in is piciocheddus prus mannus de dogi annus (85,7).

 

 

13 de gennargiu de su 2022

 

 

Màuru Mura

 

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

Foto: https://www.rainews.it/articoli/2022/01/Dal-1996-la-Fondazione-GIMBE-divulga-il-proprio-know–how-con–formazione-editoria-e-ricerca-0dae4242-0c14-43e8-b945-22483a1908b9.html