Est durau tres oras su primu atobiu de is capus de su Centrudrestra po chistionai de is eletzionis de su biniticincu de cabudanni. A s’acabu Mateu Salvini e Sirviu Berlusconi ant nau ca giai a is propostas de Giorgia Meloni.

Sa regula de su 2018 est sarva: su partidu chi in su centrudrestra, bincenduru is eletzionis, at a pigai prus votus at a tenni sa preferentzia po su nomini de su presidenti de su Consigliu. “Is regulas non si cambiant in cursa”, at torrau a nai sa “leader” de Fradis d’Italia”. E s’acordiu cun Berlusconi e Salvini est oru colau po sa Meloni chi in is cicas de is sondagius est a sus meda.

E, in su matessi atobiu, s’est serrada finas sa partida de is 221 collegius uninominalis cun s’acordiu de tenni contu de is candidaus chi podint pigai prus votus, castiendu is votus chi ant sempiri pigau is partidus. Custus is numurus: 98 a Fradis d’Italia, 70 a sa Lega e 42 a Fortza Italia.

“Deu soi un’alleau seriu po is italianus – at nau eris Salvini – sa Lega est guvernendu tres cuartus de is regionis italianas. Duncas de ita seus chistionendu? Deu soi fendumì processai poita ia doanu su fueddu po cicai de frimai is sbarcus. Mi depu presentai in tribunali su 16 de cabudanni e in su mentris funt lompendu sempiri de prus is clandestinus, custa est una de is emergentzias de s’Italia. Deu cussu chi nau cicu de ddu fairi, duncas non biu s’ora chi erribit su 25 de su mesi ch’intrat”.

In su fratempus s’at lamai “Impegno Civico”, sa formatzioni noa de Luisu Di Maio chi c’est stupau de is Steddaus. Anintru ddu ant essi totus cussus chi ndi funt bessius de su M5S e Centru Democratigu, sa truma de Brunu Tabacci, chi est giai in Parlamentu de su cumentzu de sa legisladura e chi duncas at a permitiri a Di Maio de non cicai is firmas chi serbint po presentai su simbulu nou. Abistu su piciocu!

 

 

 

Màuru Mura

 

 

 

2 de austu de su 2022

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22

 

Foto: https://mam-e.it/centrodestra-il-programma-per-le-elezioni-diventa-una-lotta-tra-le-priorita-dei-partiti/