Carburantis chi torrant a costai che-i s’oru, bulletas cun pretzius chi non parint berus e sa spesa po dogna cosa sempiri in aumentu. Finas in Sardigna cussa contras de is pretzius chi mudant, sempiri bia sus e mai bia basciu, est una guerra chi si cumbatit dì po dì e custringit famiglias medas a non si podiri permitiri su chi disigliant. E po chini tenit figlius et sempiri peus puru.

C’est chini po trabagliu depit fairi caminu e tandu depit fairi is contus cun su pretziu de sa benzina chi at torrau a tocai is dus eurus a litru, chini est su solu chi portat dinari a domu, chini tenit sa domu de pagai dogna ses mesis o dogna mesi e totu: funt medas is familias chi dogna dì tenint problemas mannus po fairi cuadrai is contus e immoi non si ndi tirant mancu cun cussu chi pariat “in prus” comenti su bustu in ristorantis o s’aperitivu a innantis de prangiu.

“Nos indi seus tirendu non feti su pani de sa buca ma finas s’abba”, narat calencunu brullendu ma non tropu. Sa vida costat de averas meda e certas abitudinis, comenti cussa chi podiat essiri sa colatzioni in su tzilleri, est diventau unu lussu chi, po calencunu, si podit fairi feti su fini de cida, ma chena aboginai tropu.

Si stringit aunia si podit , ma no est chi bastit mancu custu.

De chini sa curpa? De s’omini! Pagu de fairi. Non c’at guerras o pestas de incurpai, ma est s’omini ca prus tenit dinari e prus  ndi bolit. Est totut cussa genti chi de fatu nos agataus in donnia a fairi is contus cun is prus poburus e a impromintiri cussu chi bolint feti po sei. Is erricus funt sempiri prus erricus e is poburus sempiri prus poburus, no at a cambiai mai, est aici de is tempus antigus.

Doveri mannu depiat essiri de sa Cresia a fairi cumprendiri unu de cussus dicius prus  famaus: È più facile che un cammello passi per la cruna di un ago, che un ricco entri nel regno di Dio.

 

 

6 de làmpadas de su 2022

 

 

Màuru Mura

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22”

 

 

 

Foto: https://www.ildolomiti.it/blog/alessandro-anderle/e-piu-facile-che-un-cammello-passi-per-la-cruna-di-un-ago-che-un-ricco-entri-nel-regno-di-dio