Est serbiu pagu de averas po si pigai su coru de is tifosus de su Casteddu, ma immoi Yerry Mina est prontu po diventai unu simbulu de sa scuadra de oi e de cras. Su Casteddu, difatis, dd’at fatu ponni sa firma in pissu de su cuntratu chi at addurai finas a su 30 de lampadas de su 2028 e, chi totu at andai comenti depit, cun sa spera de ddu allonghiai de un’annu, finas a su 2029.
Mina, lompiu in su mesi de genanrgiu de su 2024, at giogau sa partida de unu contras de sa Roma su 5 de frairgiu de su matessi annu. E c’at postu pagu a si pigai sa fidi de is cumpangius, de s’allenadori de tandu (est a nai Claudiu Ranieri) e de totu is tifosus. Mina, chi in tempus passau at giogau cun Barcellona et Everton, s’est fatu connosciri massimamenti po sa barra e sa gana chi at amostau in campu, aunia cumandat, gherrat e bincit is duellus, cuberat bòcias e immoi fait finas gol. Difatis, giai ocannu passau, at fatu gol contras de sa Juventus e de su Lecce. E ocannu ddu at fatu in s’urtima partida cun su Venetzia chi at permitiu a su Casteddu de si sarvai a innantis de s’acabbu de custu campionau. Po immoi, ocannu e totu, at giogau trinta partidas e s’est amostau comenti s’anima forti de sa scuadra.
“Po mimi abarrai in Casteddu, po atrus tres annus, est de significu mannu. Bolit nai a tenni sa fidi de sa sociedadi, de totu is dirigentis e de dognunu chi ddue trabbagliat. Giai de sa dì de unu, chi soi lompiu, apu intendiu fidi manna: boleus, totu paris, sighiri a cresciri, a fairi sempiri meglius e giogai partidas de importu. M’acapiu a su Casteddu poita, torru a nai de su cumentzu, m’est partu totu bellu: po mei, po pobidda mia, po is figlius mius. Is tifosus nos agiudant candu is partidas andant beni, ma ddu faint finas candu no est aici”. Funt is fueddus de Mina a pustis airi firmau su cuntratu chi ddu acapiat a sa Sardigna finas a su 2028.
Màuru Mura
Cenarba, su bintitres de maju de su 2025
Attività realizzata col contributo della Regione Sardegna – Imprentas 2024-2025. Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2024-2025. Lei Regionali 22/2018
Foto: https://www.calciomercato.com/news/colombia-problemi-per-mina-torna-a-cagliari-al-suo-posto-cabal-d-90324
