Unu acabbu de partida po corus fortis e prus unu arresseliu: su Casteddu segnat dus gol e si fait, a pustis, sighiri de sa Salernitana po unu 2-2 chi lassat su marigosu in buca e non fait lompiri sa vitoria de unu po is orrubius-asulus. Po mori de totu custu, su Casteddu abarrat urtimu in sa classifica de Serie A.

Ranieri spantat a totus ponendu Nandez comenti de difensori de cuatru in sa drestra, cun Deiola a mesu campu e, su torrau a giogai a pustis tempus meda, Mancosu a is palas de is dus atacantis: Luvumbo cun Oristanio, po unu 4-3-1-2 chi de sempiri est su bestiri de su Casteddu.

Sa Salernitana cumentzat a fori, ma chena produsiri perigulus po Scuffet. Est, invecias, perigulosu su Casteddu cun Luvumbo, chi a innantis impignat Costil e a pusstis fait gol, ma partenduru in foras de giogu. Sa scuadra de Inzaghi s’amostat de is partis de Scuffet cun Dia, in su mentris chi Prati ci provat de foras de area, ma galu Scuffet aciapat sa bocia. A s’acabbu de su tempus de unu si contoniat in is spogliatoius cun s’arresurtau de 0-0.

Si torrat in campu cun Zappa e Viola a su postu de Nandez e Mancosu, po mori ca non teniant prus is fortzas. No est partida bella meda e sa classifica si ddue sprigat beni meda. Deiola ci provat de foras de area, ma Costil frimat sa bocia chena problemas mannus. Imbucant finas Jankto cun Obert e bessint de su campu Oristanio cun Dossena. Su meglius de sa partida, a dogna manera, depit ancora lompiri. A su minutu de 34 Viola cuberat una bocia in denanti de su centru de su campu, dda donat a Jankto chi fait sighiri po Luvumbo: Gol! Parit cosa fata po sa vitoria. Ma, a su minutu de 41, candu sa partida pariat serrada sa Salernitana paregiat is contus cun Dia. Mancu su tempus de su disisperu chi su Casteddu torrat a fairi gol cun Viola, serbiu beni meda de Shomudorov, imbucau a su postu de Luvumbo. S’acabbu de macus de custa partida arregalat un’atru spantu cun su rigori donau a sa Salernitana chi Dia ponit a is palas de Scuffet.

 

 

Màuru Mura

 

Lunis su 23 de Santu Gaine de su 2023

 

Foto: https://www.youtube.com/watch?v=KJty6ztZ9Ko