Ilaria, “at a abarrai in presoni in Ungheria” forsis finas a s’acabbu de su processu. A pustis de dis aunia dda biat beni, po Robertu Salis, su babbu de sa picioca de trintanoi annus, is atobius cun is ministrus Tajani e Nordio si serrant cun disisperu chi no iat massimamenti pensau.
“Non podeus fairi nudda”, funt is pensadas de is ministrus de is Strangius e de sa Giustissia, duncas, de parti de su guvernu italianu non at essi fata perunu pedimentu po s’acapiu in domu – comenti iant pensau is abogaus de sa maista milanesa – né po dda torrai a portai in Italia e nemancu in s’ambasciada italiana in Budapest. Perunu paperi at essi mandau in Ungheria ca, comenti narat Nordio, “no est usantzia”.
“Est andada peus meda de cantu nos aspetiaus, non bieus peruna movida chi possat migliorai sa situatzioni de figlia mia. Seus stetius lassaus a sa sola. Cantu eus pediu nos est stetiu torrau chena arrespusta. Deu pensu chi Ilaria at abarrai po tempus meda in presoni e dda eus torrai a biri ancora cun is cadenas in is processus”, at nau, deludiu e disisperau, su Robertu Salis, paris a s’abogau indenanti a s’eca de su ministeru de sa giustissia in s’orruga Arenula, a pustis s’atobiu cun su ministru Nordio.
Tempus a innantis su babbu de Ilaria cun s’abogau Eugeniu Losco iat giai atobiau “non in manera uficiali” su ministru Tajani, chi, a pustis, iat chistioanu cun is giornalistas: “Cussu chi est fendu s’Italia in custu contu est connotu e non ddu est de aciungiri nudda, sigheus a trabagliai po s’arrespsetu de is regulas europeas po is diritus de is presoneris”.
Ma a s’acabbu de is dus atobius Robertu Salis at fatu beni is contus: “S’Italia non bolit fairi nudda e totu est in manus de su giuigi ungheresu. M’ant nau ca ci funt 2.500 italianus in sa matessi situatzioni e ca non si podint fairi figlius e figliastus”.
Màuru Mura
Sabudu, su cuatru de friargiu de su 2024
Attività realizzata col contributo della Regione Sardegna – Imprentas 2023-2024.
Legge Regionale 22/2018
Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018
Foto: https://www.lettera43.it/roberto-salis-querela-matteo-salvini-diffamazione/
