At torrau gratzias a chini ddu at votau, fintzas a is senadoris chi non funt de sa parti sua, a cussus chi ddu ant precediu in sa cadira prus arta de Palazzo Madama, a Liliana Segre, a su presidenti de sa Republica Sergiu Matarella e a Giorgio Napolitano.
At cumentzau aici, Ignatziu La Russa, s’interventu comenti Presidenti de su Senau nou.
La Russa at fintzas chistionau de Sandru Pertini: “Apu cumentzau a fairi politiga de candu soi nasciu, babbu miu faiat politiga, teniat is ideas suas chi no at mai postu a palas. Deu apu cumentzau cun is organizzzatzionis de is giovunus, in is movimentus de sa cuntestatzioni, de sa violentzia, de sa resistentzia a su terrorismu. Una pariga de fueddus mi funt sempiri abarraus in conca, fueddus de un’omini chi non faiat parti de sa parti mia: Sandro Pertini. ‘In sa vida est necessariu sciri gherrai non feti chentza timoria, ma fintzas chentza spera’. E deu aciungiu chi sa lota serbit non feti candu pensas de podiri binciri, ma fintzas candu pensas chi ndi bagliat sa pena de dd’airi bivia”.
Su presidenti nou de su Senau at fintzas rendiu onori a sa ressistentzia chi funt fendu is ucrainus, a is mortus de totu is guerras, a su generali Dalla Chiesa, a su comissariu Calabresi e a Giuanni Falcone.
Non si est scaresciu mancu de arregodai is annus de prumu, de su terrorismu, de sa contestatzioni, chi ddu at bivius de giovunu militanti de su Fronte della Gioventù. E ddu at fatu fendu su nomini de tres giovunus abarraus mortus in cussus annus de cuntierra, unu de drestra, Sergiu Ramelli, e dus de manca Fausto Tinelli e Larentu “Iaio” Iannucci.
In segus La Russa at fueddau de riformas: “In custa legisladura puru nos aspetat e s’at a chistionai meda de riformas. Non depeus contai faulas nendu “totu e inderetura”, ma massimamenti non tocat a ddas timiri”.
Màuru Mura
Cenarba, su 14 de Santu Aine de su 2020
“Attività realizzata col contributo della Regione Sardegna – IMPRENTAS 2021-2022 LR 22/2018, art. 22
Foto: Ansa
