“Fueddus chi non si podint intendiri, naraus de unu chi si depit ponni a sa mesura de is eletoris po aministrai sa Sardigna. E massimamenti chi non si podint ascurtai po s’umperu de bregungia manna chi si fait de is feminas comenti chi siant orroba de bendiri”. Aici Paulu Truzzu, candidau po fairi su Governadori de sa Regioni po sa coalitzioni de su centrudrestra in is eletzionis de dominigu chi benit, segat chena ddue pensai Perdu Pinna, su candidau a consiglieri cun sa DC de Rotondi in sa Gaddura, incurpau de messagius “sessistas”, mandau cun whatsapp, aunia contat de fairi atobius politigus a is calis si portat feminas bestias in manera dde ddas fairi disigliai.

“In contus che-i custu creu ca a mei non si podit nai nudda”, sighit Truzzu, “finas poita tengiu una familia spantosa chi est su paris de tres feminas, pobidda mia e is figligeddas mias su matessi e finas poita tengiu una femina, ateretantu spantosa, chi cumandat su partidu aunia soi a intru, in prus de tenni in is listas mias candidadas feminas de calidadi chi mi funt agiudendu meda in custa campagna eletorali”.

A innantis de serrai su candidau de Fradis de Italia, acabbat cun dd’una stocada a cussa chi intendit comenti de prus perigulu, Alisandra Todde, chi ddu iat incurpau de abarrai citiu: “Mi stesiu in totu de cussus messagius e cresu chi siat stetiu unu sciolloriu mannu, ma soi seguru ca is sardus ant a stagliai is responsabilidadis de is personis de is strumentalizatzionis chi non serbint a nudda e ofendint s’’abistesa de chini depit scioberai”.

Intantis, custu merì, po su centrudrestra, sa presidenti de su Consigliu, Giorgia Meloni, at a bessiri in pissu de palcu cun Mateu Salvini de sa Lega, Antoni Tajani de Fortza Italia e Mauritziu Lupi de Noi Moderati. A innantis non c’at essi perunu atobiu istitutzionali e duncas nemancu cun su guvernadori chi est bessendudenci, Christian Solinas.

 

 

Màuru Mura

 

 

Mercuris, su bintunu de friargiu de su 2024

 

 

Attività realizzata col contributo della Regione Sardegna – Imprentas 2023-2024.

Legge Regionale 22/2018

 

 

Ativadi apariciada cun s’agiudu de sa Regioni Sardigna – Imprentas 2023-2024. Lei Regionali 22/2018

 

 

Foto: https://www.ilfattoquotidiano.it/2024/02/20/sei-ragazze-in-minigonna-per-attirare-gli-elettori-laudio-virale-del-candidato-in-sardegna-truzzu-prendo-le-distanze/7452877/