Mancu su tempus de fairi sulai is paralamentaris de Fortza Italia po sa cuntierra cun Giorgia Meloni, chi Berlusconi fueddat de atras cosasa chi faint arriolai.

De fatu sa punta de biglietu e is polemicas chi ndi funt nascias, su nervosu po Ignatziu La Russa presidenti de su Senau e s’atobiu de un’ora de mesu cun sa “leader” de Fradis d’Italia, Berlusconi narat ca dd’apat pediu de diventai consiglieri sou. “E deu mi soi postu a dispositzioni”. Po cantu pertocat is fueddus de cussu billetu narat ca no est su parrer sou.

Su votu non donau a La Russa ddu spiegat cun pagus fueddus: “Fut po tenni pari dignidadi cun sa Lega, comenti dda pedeus po is incarrigus, poita teneus su matessi valori eletorali. Is senadoris de Fortza Italia funt cunvintus de votai a La Russa a sa segunda torrada, chena perunu problema.

Passant una pariga de oras, in s’atobiu cun is deputaus de su partidu, e is fueddus mudant, massimamenti in is relatas cun Vladimir Putin. Po su Cavalieri un amigu beciu, a pustis de s’invasioni de s’Ucraina, chi perou a cantu parit no est miga tanti beciu: “Apu cicau de torrai a tenni relatas cun su presidenti Putin – s’intendit in dd’un’audiu de LaPResse – unu pagu meda, po candu apu fatui s annus mi at mandau binti ampuddas de vodka e una litara durci che meli. Dd’apu arrespustu cun ampuddas de Lambrusco e una litara ateretanti durci. Po Putin soi unu de is primus cincu amigus chi si poderat a sa strinta. Chi Kiev intrat in sa Nato at essi sa guerra mondiali. Deu non possu nai sa mia a riguardu poita chi benit contau de is giornalis ndi benit a foras unu disastru, ma soi arriolau”.

Su capu de Fortza Italia scoviat fintzas ca sa Meloni iat essi de acordiu de mandai sa presidenti becia de su Senau, Elisabetta Casellati, a su Ministeru de sa Giustitzia. Un’incarrigu po su cali, invecias, sa Meloni at giai scioberau Carrulu Nordio, comenti nau de Ignatziu La Russa puru.

 

 

 

Màuru Mura

 

 

 

Giobia, su 20 de mesi de talamini de su 2022

 

 

“Attività realizzata col contributo della Regione Sardegna – IMPRENTAS 2021-2022 LR 22/2018, art. 22

 

 

Foto: https://www.open.online/2022/10/18/reazioni-ue-berlusconi-putin/